St. Mary’s Cathe dral HSS nung awareness sentong agiogo

Kohima, Mongputeni/October 23, 2019 (TYO): Kaketshir tem dang lendong mapang aser item lendong angatetta achaayangtsü renema alitsü indang nung awareness sentong ka October 21, 2019 Hombarnü ayongzükja liasü, ta sangdong ajanga metetdaktsü.
Iba awareness sentong nung St. Mary’s Cathedral Higher Secondary School, Lerie, Kohima nungi class 10 – 12 tsüngda kaketshir 311 aser faculty 7 shilem agia liasü.
Disaster management school awareness sentong ‘lecture-cum-demonstration’ ya 12th Battalion National Disaster Response Force (NDRF) aser District Response Team, Nehru Yuva Kendra, Kohima nungi Inspector Rakesh Manipal aser ASI/LD R. Sitamong nati anir rescue team kati achaayanga liasü.
NYK Kohima nungi District Youth Coordinator (DYC) John Makhabo-i jembiba mapang pai team pela agizük.
Sentong nung St. Mary’s Cathedral Hr. Sec. School, Principal, Rev. Fr. Jaison-i NDRF aser District Response Team NYK Kohima naprongla dang pelaba lemsatepa liasü.
Iba training session nung kaketshirtem dang lendong balala asadanga aser angatetta nüngdakba meratem agitsü asoshi metedakja liasü. Iba denji külemi, lendongtem takok ngua achaayangtsü asoshi mezüng renemshia alitsüji kanga dang nüngdaker, ta kaketshirten dang ashi.
Training agütsür volunteer mongintemi kaketshirtem nem tim training den külemi tesayuba agüja liasü. Maneni, kaketshirtem tsüngda mi remseptsü yimya, CPR aser rongdak mapang yariba yimya metetdaktsütsü mechi mock drill sentong agia liasü.