St. Xavier College, Jalukie nung Autumn Face Season-1 agi

Jalukie, December 04 (TYO): November 30, 2019 nü St. Xavier College Auditorium, Jalukie town nung Autumn Face Season-1 agidang designer pongui inyakba mapatem sayaogo; iba sentong ya Beti Bachao Beti Padhao (BBBP) kübok “Where Passion Soars” omen nung ajemdaker Hill Tribes-i District Administration aser DLCW den ayongteper ayongzüka liasü, ta Bodhbarnü ketdangsertem osang ka ajanga metetdaktsü.
Iba sentong nung tetushi tejaokerji ADC Jalukie, Dr. Tinojongshi Chang liasü.
Iba sentong nung jembidang Hill Tribes Director, Kedi Nsa-i, iba sentong ayongzükba tongtibangba nükjidongji sempet alir lanurtem pei dak aketba sempet jangjadaktsütsü atema sabang agütsütsü asoshi lir, ta ashi.
Paisa, iba sentong ajanga lisopur fashion designers aser models ajungkettsüba den külemi Fashion World aser Music Industry nung mongin kümdaktsütsü atema lir, ta metetdaktsü.
Paisa, lanurtem rongnung kentener aser stage artist tajung aika lir, anungji iba sabang ya ajanga parnoki jangraba sayatettsü aser parnok sempet ajungkettsütsü, ta ashi.
ADC Jalukie, Dr. Tinojongshi Chang-i, iba sentong omen “Where Passion Soars” nung ajemdaker jembidang pai nüburtem, lokti tentet balala aser sponsors-i iba sentong nungitba atema pelaba lemsatep.
Iba ama sabang agütsüba ajanga sempet alir asen jala jabasotem taküm nung temelenshi alitsü aser mongintem akumtsü, ta paisa ashi.
Beti Bachao Beti Padhao (BBBP) dak sendakba nung ADC Jalukie-i, tanü lokti nung tetsürtemi loktiliba atema mapa tajung jenti inyakbaji asenoki reprangtettsüla, anungji tetsür/jala ajak kasa nungita yaritsüla aser kibong nung tetsür sendokba yimya indoktsüla, ta ashi.
Kasa sentong nung Miss Peren 2019, Gimlule Newme (Icon of BBBP, Peren District) aser Mr Kohima 2019, Kevingungu Mere natia o tatsütsü jembi aser Autumn Face Season-1 Chairman, Keyicetpeung Kulimbe-i tepela anküp o jembia liasü.
Iba sentong nung model temi designers- Etuna Iralu, Benwang Newmai, Keyiteizeule Ndang, Ari aser Tingthengringliu Newmai nungeri design asüba süsohitem saya.
Parnok indang designs aser collections ji official instagram page @Autum_Face nung angutsü. Kasa sentong nung tsüngsangba den kentenmenü densema shilem balala agia liasü, ta kasa osang ajangasa metetdaktsü.