‘Startup India in Nagaland’ portal lapokogo

Dimapur, August 16 (TYO): August 16, 2019 nü Nagaland Chief Secretary, Temjen Toy-i ‘Startup India in Nagaland’ portal lapoktsüogo.
‘Start-up policy’ ka aliba ajanga lanurtemi takok anguba entrepreneur tem akümtsü ajungmesotsü aser iba portal ajanga mapa manguba lanurtemi pei sasa shishilembatsü atema teyaritem angutsü, ta Temjen Toy-i ashi.
Industries and Commerce department-i iba portal yangluba atema pelar aser iba ajanga lanur aika ajangzüktsü imlar, ta paisa shisem.
Chief Secretary indang conference hall nung agiba sentong nung Industries & Commerce, Principal Secretary Lithrongla G. Chishi, IAS-ia o jembidang “Nagaland nung Startup India ajanga state nung aliba ‘Startup Eco System’ balala asoshi teyari agütsütsü” ta ashi.
Nagaland state nung lanurtemi online nung register asütsü aser ‘Startup Nagaland’ kübok agizüktsü atema Nagaland Startup portal ya lapokba lir. Iba portal ya www.startup.nagaland.gov.in nung lir aser ‘Startup policy’ kübok state nung lanurtemi incentives & programs angutsü, ta laisa metetdaktsü.
Department-i mapa kanga meranga inyakogo aser IT department-i mapang tatsüka tsüngda website yanglutsüba atema pelar, ta Lithrongla G. Chishi-isa shisem.