State 5 nung Governor tasentemi tezüngzüktep agiogo

Agartala, July 29 (Agencies): Taoba Union minister aser Chhattisgarh nungi tenetben tashi Lok Sabha MP Ramesh Bais-i tanü Tripura nung Governor inyaktsü tezüngzüktep agiogo.
Arishi küm 72 tain Bais-i Tripura nung Governor 18 buba inyaktsü. Tanü Raj Bhavan nung Tripura High Court chief justice Sanjay Karol-i pa nem tezüngzüktep agidaktsü.
Iba sentong nung Tripura chief minister Biplab Kumar Deb, par cabinet züngsemtem aser political party balala nungi lennirtem aden.
Ajisüaka, taoba chief minister Manik Sarkar dena Congress aser CPI-M lennirtemibo iba sentong nung maden.
“Centre sorkar teyari ajanga ni Tripura renlokdaktsütsü atema kü tajungtiba agi inyaktsü” ta Bais-i ashi.
Ramesh Bais-i Kaptan Singh Solanki ket nungi Tripura Governor mapa melenzükogo.
Maneni, taoba Gujarat Chief Minister Anandiben Patel-ia tanü Uttar Pradesh nung Governor inyaktsü tezüngzüktep agiogo. Lai Ram Naik ket nungi iba menden melenzüker.
Taoba Bihar Governor Lalji Tandon-ia tanep Madhya Pradesh nung Governor inyaktsü tezüngzüktep agi aser pa melena Phagu Chauhan-i Bihar Governor tezüngzüktep agia liasü.
Ano, tanü Madhya Pradesh nungi taoba BJP MP Anusuiya Uikey-i Chhattisgarh Governor inyaktsü tezüngzüktep agi.
July 20, 2019 nü President Ram Nath Kovind-i Uttar Pradesh, West Bengal, Tripura, Madhya Pradesh, Bihar, aser Nagaland state tem nung Governor tasentem shimba osang metetdakja liasü.