State 7 nung aluyimertemi anogo 10 nü longkak ait tenzükogo

New Delhi, Aami/June 01 (Agencies): Yaküm Mandsaur nung aluyimertem longkak aitba mapang police-i injang yokba ajanga aluyimer trok khasetba sülen küm ka ajungba nüngtem nung state tenet nungi aluyimertemi tanü nungi tenzüka anogo 10 nü longkak ait tenzükogo.
Madhya Pradesh, Maharashtra, Punjab, Rajasthan, Uttar Pradesh, Karnataka, Haryana aser Chhattisgarh state tem nungi aluyimertemi Aami/June 1 nungi tenzüka mamatzü jenjang aser sentsüh atoktsü densema takhangba onük balala agüja longkak aiter.
Aluyimertemi mamatzü, aonsotsü aser alu nungi züsentetba chiyungtsü balala supply asüba anenba ajanga shishilembadak aonsotsü nung jenjang kanga tuogo.
Punjab nungbo aluyimertemi lenmang nung mamatzü yimdokja longkak aitba den külemi market balalai aonsotsü bener aoba nokdanga liasü.
Iba dak sendakba nung Rashtriya Kisan Mazdoor Mahasangh Tir, Shiv Kumar Sharma-i, “Aluyimer tentet 130 dak tema onok den lir. Iba ya linük tesem ajungalen longkak aitba mesüka kümogo. Ajisüaka onoki yimtitemibo maotsü, kechiyong onoki nüburtem libaliro nung timtem magütsüner,” ta metetdaktsü.
“Onoki Aami/June 10 nikongdang 2:00 ako tashi longkak aittsü lemtetogo. Tesüiba kümtem nung aluyimertem asüba bilemteta akhüm agütsütsü atema ni shishilembartem dang nikongdang 2:00 ako tashi dokan shibangtsü mepishir,” ta pai ashi.
Maharashtra State Kisan Sabha nung tongti tezülur, Dr Ajit Navale-i, “Onoki state nung tehsil office-i nashi bener oa item office kikümbang nung sendaktsü. Ibaji ajanga sorkari aluyimertem tebilemtsü angatettsü ta onoki amanger,” ta ashi.
Aami 6, 2018 nü Congress Tir, Rahul Gandhi-i Madhya Pradesh kübok Mandsaur anasa Piplya Mandi yim semdangtsü. Yaküm iba anogo nung Mandsaur nung longkak aitdang aluyimer trok asü. Rahul Gandhi-i mangyim den repsema lokti senden ka ayonga agitsü.