State 8 nung menden 10 atema by election agi

New Delhi, April 09 (Agencies): Deobarnü Srinagar Lok Sabha menden den state 8 nung assembly constituency 10 atema by-election agiogo.
Deobarnü by election agiba assembly constituency mendentemji: Rajouri Garden (Delhi), Litipara (Jharkhand), Nanjangud aser Gundlupet (Karnataka), Dholpur (Rajasthan), Kanthi Dakshin (West Bengal), Ater aser Bandhavgarh (Madhya Pradesh), Bhoranj (Himachal Pradesh) aser Dhemaii (Assam) liasü.
Yaküm Hizbul Mujahideen commander, Burhan Wani tepsetba sülen Jammu & Kashmir nung mepetmesü tulu adokba mapang Peoples Democratic Party MP, Tariq Hameed Karra anenba ajanga Srinagar menden azüngteta liasü, aser tanü iba menden atema taoba Jammu & Kashmir, Chief Minister Farooq Abdullah-a toktepogo.
Lok Sabha by-election votes April 15 nü azüngtsü aser assembly by election votes April 13 nü azüngtsü.
AAP lenir, Jarnail Singh-i West Delhi kübok Rajouri Garden assembly menden azüngtetja liasü aser tanü iba menden atema by-election agi.
Maneni Bodhbarnü Lok Sabha menden ana atema by-election agitsü. Lok Sabha menden anaji J&K nung Anantnag aser Karela nung Malappuram menden na lir.
Anantnag menden ya Jammu & Kashmir Chief Minister, Mehbooba Mufti-i azüngtettsü aser taküm February ita nung IUML lenir, E. Ahamed süadokba ajanga Malappuram menden tazüng akum.
Iba dak alia Bodhbarnüsa assembly menden ana- Dr. Radhakrishnan Nagar (Tamil Nadu) aser Upper Burtuk (Sikkim) by election agitsü.