State ajak nung SCW tentettsüla: SC

New Delhi, October 22 (Agencies): Tanü Supreme Court-i Centre dang, linük tesem ajungalen state commissions for women (SCW) lir ma? ta asüngdang.
Vrindavan yimti densema yimti aika nung sensaker amitsürtem taküm jenjang mejungi aliba nung ajemdaker Supreme Court-i sorkar dang ibaji asüngdang.
Amitsür sensakertem kanga timtema aliba dak sendakba temepishiba ken otem SC-i angadangdar, aser court-i Centre dang, state koba nungsa state commissions for women mali, item state nung iba committee tentettsü tuyuang, ta metetdaktsü.
Justice, M B Lokur-i aniba bench-i, “Solicitor General-i onok dang, SCW ji state ajak nung lir asü maliar metetdaktsütsüla, aser melira state sorkar tem dangji lateta aliba ama iba committee tentettsü tuyutsüla,” ta metetdaktsü.
Centre-i SC bench züngsem- Justices S Abdul Nazeer aser Deepak Gupta nunger dang, sorkari teinyaktsü balala bangjema aliba asalentongtemji affidavit ka nung agütsütsü, aser iba asalentong nungji linük nung sensaker amitsürtem taküm jenjang tajungba akumtsü atema mera aika agia aliba indang shia lir, ta metetdaktsü.
Iba dak sendakba nung SC-i Centre dang, iba mapaji hopta 6 tsüngda inyakang aser iba ken o maneni December 6, 2017 nü angadangtsü, ta metetdaktsü.
Taküm August ita nung SC-i, makamait amitsürtemji lokti nung kanga tepetzük tia nung alirtem lir, aser parnok nem tim akhüm magütsür, parnoki shelter homes nüngdaker, ta metetdakja liasü.
Supreme Court-isa, “Linük tesem aika nung amitsürtem aika lokti nung sendoker. Aser iba kuliji ajanga parnok Vrindavan aser tanga ashram-i arua alir, ajisüaka tia makai, parnoki tim akhüm tangutsü mangur,” ta shia liasü.
“Item teyarir malir amitsürtem atema court-i linük temzüng dak sendakba nung tiyongtsüi aita inyaktsüsa akumer,” ta court-isa metetdakja liasü.
Amitsürtem tanaben kibong kümra iba nungji parnok atema teimla tasen lir, ta tangatetba nung iba dak sendakba bushisüngdangtsü atema züngsem 6-i akumba committee ka tentetogo, aser iba osangji taküm November 30 tashi nung agütsütsü.