State ajaki tensa asadangertem yoktsü

New Delhi, November 20 (Agencies): November 8 nü Ato kilonser, Narendra Modi’er sorkari sen note 500, 1000 anentsüba telemtetba nungi matsüngshitsü, aser sorkar telemtetba ajanga nüburtem koma kongshir’ar asadangtsü atema Centre-i ketdangsertem state balalai tsüngdong yoktsü lemtetogo.
Tongti ketdangser kati ashiba agi, “Parliament nung senden junga mekatetba den külemi linük nung chief minister temi aija ola adokba sülen Modi-i sangdongba nungi matsüngshiba metetdaktsütsü atema iba telemteba agiogo,” ta metetdaktsü.
Personnel & Pension Ministry nung director-level officer, Jagannath Srinivasan-i states aser Union territory balalai yoktsü atema ketdangsertem tenüng teta agütsüogo.
“Item ketdangsertem ya state balalai tsüngdong oa tensa asadangtsü aser osang agütsütsü atema mapa lemzüktsür,” ta Jagannath-i ashi.
Osangbener den jembidang Ministry nung ketdangser kati, state balala nem mapa lemzüktsüba teams-i Ato kilonseri lemtetba maparen koda inyakdar, iba osangji sorkar nem agütsütsü, ta ashi.
Ketdangserisa, timtem ajema akumtsü atema state sorkar süaka mesüra commerce nungi süaka takhangbatem reprangshitsü atema Centre-i melunga dang lir, ta shisem.