State Angh Acharya-i Lotha nunger den Tokhu Emong salem lemsatep

Kohima, November 05 (TYO): Tokhu Emong benjungmong mapang nung Nagaland Angh, PB Acharya-i Lotha nunger den iba benjungmong salem lemsatep.
Tokhu Emong benjungmong ya alu arühba aser adianu tsüngda taitoktepa longjemba benjungmong ka lir.
Paisa Lotha nunger dang mapang agia Tsüngrem nem Pa temeim aser temoatsütem atema tenüngsang agütsütsü mepishi.
Angh Acharya-i Lotha nunger dang, iba benjungmong ajanga maneni pei takar sobaliba kümzüka ayutsü aser ajungkettsütsü ayongzükba den külemi longjemer jila aser yimtsüng ajak nung tesünep alitsü aser state nung lenla ajaklen terenlok alitsü atema inyaktsü ayongzük.
Angh-isa Lotha nunger dang aluyimertemi meranga inyakba atema parnok dang pelaba lemsateptsü ajungshi.
Paisa, aluyimertem atema Central aser State sorkartem welfare projects aika lir, aser item rongnung soil testing, Kisan credit card, National Food Security Mission ama project lir, aser ibaji ajanga alu nungi züsentetba jenjang tajungba akumtsü, ta ashi.
Iba dak sendakba nung Angh-i, “Item projects aluyimer nem metetdaktsütsü aser parnok tajangzük ngudaktsütsü atema item service agitsü asoshi parnok ajungshitsüji asenok khuret lir,” ta ashi.
“Tokhu Emong benjungmong ajanga Naga nunger, talisa Lotha nunger nem yimjung, tesünep, telongjem aser azükaru bener arujangma ta sarasademer,” ta Angh-isa metetdaktsü.