State Angh aser CM-i mangyimer

Kohima, Luroi/August 16 (TYO): Bharat Ratna angur aser India Ato kilonser asemben tashi inyaksang, Atal Bihari Vajpayee asüba ajanga tanü linük nübur ajaki mangyimer; pa ya yimtenren lenir tetangshi ka, o tsüngro songa jembir ka aser Parliament züngsem tajung ka liasü, iba dak alia India nunger lenir ka liasü, ta Nagaland Angh, P B Acharya-i sangdong ka ajanga metetdaktsü.
“Küm 20 tashi asür Vajpayee den külemi party nung inyaker ka ama inyaksemba atema ni kanga moaogo,” ta paisa ashi.
“Pa asüba ajanga chichiba yimtenren lenir ka, meimchir tajung ka, sangro mejemer ka, teintet lenir ka aser linük meimer ka makai kümogo. Angh ka ama Nagaland nung alirtem tenüng nung, aser kü nija sasep nung asür nem akhüm agutsür aser mangyimer. Asür tanela tesünep nung anisüngzükang,” ta Angh-i lemsatep.
Ano tanga sangdong ka nung Nagaland Chief Minister, Neiphiu Rio-i, taoba Ato kilonser, Atal Behari Vajpayee tanü New Delhi nung asüba osang angashia jashir, ta metetdaktsü.
“Asür Vajpayee ya tanü India nung teintet lenir ka liasü, aser linük nung nüngtugu Ato kilonser rongnung ka, ta bilemtettsü,” ta paisa ashi.
“Nagaland nung alirtem melungjang nung taoba Ato kilonser lir. October 2003 nung pai anogo asemnü Nagaland semdangba mapang nung pai Kohima nung putisütsüsa sangdong ka metetdaktsü, aser ibaji ajanga Naga nunger o tanüngba linük na tsüngda tesendaktep nung otsü tasen ka yanglu,” ta paisa metetdaktsü.
Iba mapang nung Vajpayee-i, “India nung state ajak rongnung Nagaland putiotsü ya khenyongi balaka, aser ibaji atangji” ta ashi, ta CM-isa metetdaktsü.
“Asür Atal Bihari Vajpayee ya Ato kilonser tajung rongnung ka liasü. Ni lenla ajak nung pa akuhümtsübu aser pa lenisüba kübok inyaksembaji ni asoshji maongka tajung liasü,” ta paisa ashi.
“Pa asüba ajanga asenok mepelar, ajisüaka iba mapang ya pa akumli indang benjungtsü mapang ka lir. Linük den külemi Nagaland-ia mangyimer aser lenir nem akhüm agutsür. Ajak takoksang Tsüngremi pa tanela tesünep nung anisüngzükdakjang ta sarasademtsür, iba denji külemi asenoki anogo aben asür Vajpayee tesayubatem benshia lidi,” ta paisa lemsatep.