State Angh-i BS&G aser Rajya Sainik züngsemtem ajuru

Kohima, Aami/June 22 (TYO): Tanü Kohima nung Nagaland Angh, PB Acharya-i Bharat Scouts & Guides office aser Directorate of Rajya Sainik Board semdanga liasü, ta tanü PRO to Governor sangdong ka nung metetdaktsü.
Tentet ana den office balala nung temeja sentong agia BS&G aser Rajya Sainik naprong nung ketdangsertem aser staff tem den jembidang Angh, PB Acharya-i, India linük nung tanga state tem den medemdangra tang tashi North East Region nung aliba state tem terenlok nung tesülen kanga atsüngzüka lir, ta metetdaktsü.
Tejakleni aotsü atema asenoki tentet tashi itdaktsütsüla, ta shia pai state terenlok nung shilem tajung agitsü atema ayongzük, ta kasa sangdong nung shia lir.
Angh Acharya-i ashiba agi, tawa India Tiri linük nung Anghtem dang tashi aliba tentettem den mapangshia senden mena loktiliba ajungkettsütsü atema shilem tajung agitsü asoshi ajungshiang ta metetdaktsüogo.
Tashiji tashi maitiba nungji keta lir, ta shia pai tentet ana dang nüburtem dang Centre aser state sorkar indang schemes balala metetdakja nüburtem tajangzük ngudaktsütsü ajungshia liasü.
Paisa, tentet ana indang miim tashi amshia nüburtem, talisa kanga tezülen aliba tesem nung alirtem ayimjema inyaktsü ayongzük.
Pai BS&G aser RSB züngsemtem dang mapang shia yimtsüngtem semdanga merükmeju jenjang, azüng-zülu aser immunisation indang metetdaktsütsü aser Central den State Flagship Programmes ajanga tajangzük angutsüpurtem jangjatsü ayongzük, ta sangdong nungsa shia lir.
Nagaland Angh, PB Acharya ya Nagaland State Bharat Scouts & Guides nung Chief Patron aser Rajya Sainik Board nunga Tir lir.