State Angh-i National Bravery Awards angur nem tetushi agutsü

Kohima, Tsüklai 03 (TYO): Nagaland Angh, PB Acharya-i tawa National Bravery Award 2017 angurtem- Mansha, Shangpong, Yaoknei aser Chingai nunger nem tetushi agutsüogo, ta tanü PRO to Governor-i sangdong ka ajanga metetdaktsü.
Aenjeti 23, 2018 nü New Delhi nung Ato kilonser, Narendra Modi-i iba Award agutsürtem rongnung Nagaland nungia par pezü ya densema liasü.
State Angh-i, Meribeni aser Chumben na kümzükba maparen nung kanga tatsütait tanela sayuba ajanga iba award agutsüba ajanga parnok nem tim tetushi agutsüogo, ta metetdaktsü.
Angh-isa National Bravery Award angurtem dang maneni mapa tajung inyaktsü aser nümatanga aser akhümketa nübur tenzüktsü ajungshia liasü, ta kasa sangdong nungsa shia lir.