State Angh-i NIT kaketshirtem den shisa lemsatep

Banquet Hall, Raj Bhavan nung state Angh, R.N Ravi-i National Integration Tour (NIT) kaketshirtem den tangokba noksa nung angur.

Kohima, Aenjeti/January 17, 2020 (TYO): National Integration Tour (NIT) Flag-in den NIT kaketshirtem den shisa lemsatep sentong aser Youth Exchange Program (YEP) NCC cadets sentong January 17, 2020 nü Raj Bhavan, Kohima nung agiogo, ta tanü ketdangsertem osang ka ajanga metetdaktsü.
Iba sentong nung Nagaland Angh, R.N Ravi-i kaketshirtem den shisa lemsatepa liasü, ta kasa osang ajanga metetdaktsü.
Iba sentong nung ajembidang Dy. Comdt K.S Thakur-i, küm shia Assam Rifles-i India tesem balala nung National Integration Tour (NIT) ya ayongzüker, ta metetdaktsü.
Iba tour ya tongtibangsüa loktiliba nung maongka junga mangur kaketshirtem atema lir, koba ajanga item ama kaketshirtemi putiotsü tesemtem, scientific aser sobaliba dak sendakba tesem balala semdanga parnoki jenti angazüker, ta paisa metetdaktsü.
Iba sentong ya lanurtem ajungmesotsü aser taküm lenla ajungalen lenisüba maongka agütsütsü atema lir, iba denji külemi linük tenzüktsü atema mapang ajak nung renema alitsü asoshi lir, ta Thakur-i metetdaktsü.
Pai ashiba agi, iba tour nükjidong ya India nung Bengaluru aser Chennai ama yimti tulutem nung lanur tetsürtem renlokdaktsütsü atema lir.
Iba dak alia küm shia NCC-i sentong balala ayongzüka agia arudar, aser item rongnung Institutional training, camp balala, national level sentong balala, adventure activities aser tanga linüktem den Youth Exchange Program (YEP) agiba densema lir, ta paisa metetdaktsü.
Taküm Kohima nungi NCC group-i NCC Directorate North East Region tenüng nung NCC cadets asem yoka liasü, aser par asemji:- St. Joseph College Zakhama nungi 1 Nagaland Girls Bn NCC, Vinole Keso, Singapore-i yok, Kohima Science College nungi 1 Nagaland Air Squadron NCC, Deepak Das, Kazakhstan-i yok aser St. Joseph College Kohima nungi 24 Nagaland (I) Coy NCC, Karipong, Sri Lanka-i yoka liasü.
Iba sentong ya HQ 15 SECT Assam Rifles HQ IGAR (North) kübok 40 Assam Rifles-i ayongzüka liasü.