State Angh-i Raj Bhavan Secretariat Website lapoktsüogo

Oct. 08, 2015 nü Kohima nung Nagaland Angh, PB Acharya-i Raj Bhavan official website lapoktsüba noksa nung angur. Noksa nung iba sentong nung adener ketdangsertema angur.
Oct. 08, 2015 nü Kohima nung Nagaland Angh, PB Acharya-i Raj Bhavan official website lapoktsüba noksa nung angur. Noksa nung iba sentong nung adener ketdangsertema angur.

Kohima, October 08 (TYO): Tanü Brihostibar nü Nagaland Angh, PB Acharya-i Raj Bhavan nung official website ka lapoktsüba sülen jembidang, Raj Bhavan website lapoksüba ya ni asoshi maongka lir aser ni kanga pelar, kechiyong iba ya Raj Bhavan nung ano alizüng ka atongba lir, ta ashi.
Iba website sangdongba mapang paisa, “Iba website nung nenoki Governor’s secretariat osang aser iba dak sentakba maparen balala osang angutsü,” ta ashi.
Iba website address ji http://rajbhavannagaland.gov.in lir.
Iba website ya nisung ajaki lapoktettsü, aser iba website nung Raj Bhavan indang aser iba ajanga inyakba osangtem nisung ajaki angutsü.
Website nungsa Raj Bhavan, Governor Profile, Role & functions of Governor, taoba mapang Anghtem profile, Angh adenba sentong balala, Angh-i onük jembiba aser Angh-i sangdongba osang ajak angutsü. Iba dak alia Raj Bhavan indang RTI, Angh sentongtem aser tarutsü aliba sentongtem ajak metettsü.
Kobi melii mapang tatsüka tsüngda ano osang aika inoktsütsü.
Angh Acharya-isa, tanü digital lima nung nüburtem den sentakteptsü tongtibangtiba sabangji website lir, ta ashi.
Iba website tenzüktsü atema inyaker ajak aser NIC Nagaland dang pelaba pai lemsatepogo.
Tanü iba sentong nung Nagaland Chief Secretary, Pankaj Kumar IAS aser tanga sorkar ketdangsertem aika dena liasü.

You must be logged in to post a comment Login