State Angh, PB Acharya-i kaketnang atema kaket agütsü

Kohima, Aami/June 07 (TYO): ‘Library Programme’ dak sendakba nung June 7, 2019 nü Nagaland Angh, PB Acharya-i Government Middle School, Officers Hill, Kohima nem Library kaket aser kaket ayuba sadem agütsüogo; ‘Library Programme’ ya Team NagaChetana, Rotary Club of Karkala aser Reading Star-i sponsor asü, ta tanü PRO to Governor sangdong ajanga metetdaktsü.
Iba programme ya Mumbai nungi NGO- India National Fellowship Centre (INFC)-i ketdangsüba lir aser Angh Acharya-i achaayanga inyak.
Acharya-i, Nagaland tashi itshitsü atema sorkar school temi agitsü tongtibang shilem lir, ta shia tesayurtem dang kanga nendaka inyaktsü aser kaketshirtem dang pei tajungtiba agi sayutsü ajungshi.
Paisa, shisaliok ajanga shisatsü agütsüba nung tanur shinga mesendoktsüla, ta shia tsüraburtem dang pei chirnur anogo shia school-i yoktsü ajungshi.
Angh-isa, sensak tia ya atakatem mesüra tashidak ka masü, anungji iba atema taneptsüji shisaliok lir, ta ashi.
Kaketshirtemi parnoki anguba shisaliok amshia pei tarutsü jenjang yanglutsü aser loktiliba den Nagaland yangertsüji pei dak keta lir, ta paisa ashi.
Acharya-i kaketshirtem dang iba kaketnang (library) tajungtiba nung amshitsü aser akokba tashi kaket timba azüngtsü ajungshi.
Kaket azüngba ajanga shisatsü arener aser tasen aika angazüker, ta paisa ashi.
Paisa Officers Hill colony nung alirtem danga iba Middle School ajungkettsütsü atema peii akokba lenmang balala agi yariteptsü ayongzük.
Iba school ‘adopt’ asüla Angh kinüngtsü, Kavita Acharya-i, kaketnang aser saisapong ya shisaliok den sendaktepa lir, ta shia kaketshirtem dang tang tasen amenokba kaketnang nung aliba academic aser general knowledge kaket 200 ji akokba tashi aika azüngtsü ajungshi.
Laisa iba kaketnang atema sponsors aser kaket tenlartem dang pelaba lemsatep.
Library Programme kübok Kohima district nung school pezü shimogo aser item school nem India nunger kaket aser bendanglen adokba kakettem agütsüba ajanga tanurtem lenla balala nung tajangzük angutsü.
Iba sentong nung kaketshirtem, tesayurtem, colony nungi lenirtem aser SCD Burfiwala High School, Mumbai nungi tesayurtem dena liasü.
April ita nunga Durbar Hall, Raj Bhavan Kohima nung shisa lemsatep sentong ka agidang Angh Acharya-isa Team NagaChetana-i Dimapur Visually Impaired School nem agütsüba Braille kakettem lemja liasü.