State Angh, Rotaract Club, MCD, DDCF-i Eid salem lemsateper

Dimapur, September 24 (TYO): State Angh P.B.Acharya-i, “Id-Ul-Zuha benjungmung anogo nung Nagaland nung aliba Muslim adianu aser aianu ajak den kü mulung taroktiba agi Id salem lemsateper,” ta metetdaktsüogo.
Id-Ul-Zuha ya Islam amangertem asoshi benjung tulutiba lir aser iba benjung dang bendanga agütsüba benjung taa ajar. State nung tamangba yimsü aika liaka iba benjung tangatetba tajung nung amungtsü ajungshir, ta pai shisem.
Dimapur Rotaract Club, Tir Rtr Jakir Hussain den Club züngsem ajaki nüburtem ajak den “Eid al Adha” salem lemsatep dang Jakir-i, “Bendanga agütsüba benjung ajanga nüburtem ka küma lungjemtsü aser temeim tali renlokdaktsütsü imlar ta amanger,” ta ashi.
Ano Muslim Council Dimapur (MCD)-ia Nagaland nung nübur ajak den tepela IDD-UL-ZUHA salem lemsatepogo. MCD, Tir A.Rahman-i, iba bendanga agütsüba benjung ajanga lokti ajak nung yimjung aser teputep bentsür arutsü imlar, ta ashi.
MCD-i ashiba agi, Nagaland nungia Haj asoshi parnok 19 shimteta Saudi Arabia-i aortem Mecca nung temeshi aini aortem 700 dak tema ajemsetba aser nisung 800 shi yiruba nungi jenbua junga lir. Iba den külem asür kinünger den mangyim lemsatepba metetdaktsüogo.
Kasa anogo nung Dimapur District Citizen Forum-ia state nung aliba muslim amanger ajak den Id-Ul-Zuha salem lemsatepa liasü. DDCF, Tir Joseph Lemtur-i, IDD ajanga nübur ajak, talisa Muslim amangertem tsüngda yimjung aser telungjem tali bener arutsü imlar, ta lemsatepa liasü.

You must be logged in to post a comment Login