State asem assembly election nung BJP-i tamakok angutsüa akok: J Reddy

Hyderabad, Aami/June 29 (Agencies): Madhya Pradesh, Rajasthan aser Chhattisgarh Assembly election ya tekeraba nung agitsü südi, kechiaser BJP-i takok mangutsüa akok, aser Ato Kilonser Narendra Modi-i iba tamakok maginür, ta tanü Congress lennir tain, S Jaipal Reddy-i ashi.
Küm tatemlen state asem nungji assembly election agiba nung BJP-i tamakok angutsü, ta taoba mapang Union Minister-i ashi.
“Kuliji kanga tongmelang. Kechiaser Madhya Pradesh aser Rajasthan nung BJP-i tamakok mejungi angutsü. Iba sülen Modi-i linük matsüngdang tejak metentettstsü,” ta Reddy-isa ashi.
“Anungji Modi-i state asem nung tamakok anguba khuretji maginür. Iba sülen BJP ya tamakok angutsü alinung yimjak nung tuteta jembitsü,” ta paisa ashi.
“State asem nung BJP nükla tajung mangur asünung, Modi-i election ya tekeraba nung aginütsü, aser iba ajanga dang pa matamabensar ka ama masütsü. Saka yimtenren nung shibai tejangja shitettsü?” ta paisa shisem.
Lok Sabha election nung BJP den tokteptsü asoshi opposition-i inyaktsü ajak agi, election magidang BJP anemer ajunga ka küma longjemtsüla, ta Reddy-i ashi.
“Parnok (BJP anemer telok) temetet election sülen ka küma longjemtsü. Saka parnok election magidang ka küma longjemtsüla, kechiaser election magidang longjemba ajanga menden timba angutsü,” ta pai ashi.
Congress aser BJP anemba regional party tem tangatettep kati maruteti alirtemi nokdaktsü aser election sülen longjemtsü. Saka iba amala state ya eshika dang luir, ta Reddy-isa ashi.