State balaka meshiba anema TYF-i raratsü

Agartala, January 15 (Agencies): State nung tribal party kar ajanga ajungmesoa state balaka razüka aotsü atema sentong yangluba anema, Tripura nung ruling party CPI(M) indang youth wing Tribal Youth Federation (TYF) teloki maneni raratsü, ta metetdaktsü.
Indigenous People’s Front of Tripura (APFT) telok-i state lemdangtsü asoshi maparen inyakba anema TYF-i noktaktsü, ta TYF nung General Secretary tasenba, Amalendu Debbarma-i osangbener den tanü jempidang metetdakja liasü.
State level conference anogo asemnü amongba nung iba ken-o nung TYF noktaka aliba indang kanga süoki ia jembia liasü, ta paisa shisem.
“State nung yimjung raksatsütsü maparen inyakba anema nüburtemi nokdaktsü onoki ajungshir. State ajungtsü asoshi TYF-i maneni inyaktsü,” ta Amalendu-isa ashi.
Tiyazü kuli agüja BJP aser Trinamool Congress-i state nung tribal purtem asoshi Autonomous District Council (ADC) meshitsü atema IPFT nem shisatsü tamajung agütsür, ta Debbaram-i BJP aser Trinamool Congress aija ashi.