State BJP Nagaland-i NPF dang langzür

Dimapur, November 30 (TYO): India Prime Minister, Narendra Modi-i ochishia aser sorkar ketdangsütsü aser nübortem tenzüktsü ayimmoktsüba yimyim sülen BJP noktaka lir, saka NPF-i BJP aija ochimashi pusema nungitba angudang aoksar, ta State BJP Nagaland sangdong ka nung metetdaktsü.
State ka nung tekolakba Governor lir, anungji pai State kübok tesem mashii ka semdangtsü akok. Anungji, Governor-i state kübok tesem balala semdanga senzüba nung kechiba NPF-i ashishir, ta BJP Nagaland Spokesman, Yanghose Sangtam-i sangdong nung shia lir.
Nagaland nung NGOS, Organisation, Political party mashi kati Raj Bhavan nung Governor den ajurutepa parnok indang khurettem lemsateptsü akok, ta paisa shisem.
BJP MLA tem nem mapa tajung lemzükja lir ta jembir saka chichiba nung item mapatemji tongtipang asü masüar nübortemi metettsü nüngdaker. October 28, 2016 nü Parliamentary secretary Mhonlumo Kikon anentsüba sülen kasa portfolio ji BJP MLA asem nem lemsatsü aser itemji Labour & Employment, Transport & Communication, Cooperation, Skill up gradation, Treasure & Accounts, IT aser Border Affairs lir, ta sangdong nungsa shia lir.
BJP President aser DAN Vice Chairman nem Parliamentary Secretary jenjang lemzüktsü saka CEC meeting nungbo BJP State President nem cabinet jenjang agütsü ta ashi. Anungji, sorkari Cabinet jenjang lemzüktsübaji regularize asütsüla, ta parnokisa takhangba agütsü.
Ano, NPF aliba ajanga BJP alir ta jembiba olen atema, “BJP-i aniba NDA sorkari teyari agütsüba aliba tang aliba DAN sorkar alir” ta BJP-i meyiptsü.
2003 nungi 2009 küm tashi BJP aser NPF na alliance partner liasü saka BJP MLA 2-i NPF nung adenba ajanga 2009 küm tesentaktep pila. NPF nung adenertem rongnung tang teinyakdak Home Minister dena liasü. 2013 nungang DAN tesentaktep tanaben yanglu.
June 24, 2016 nü Mokokchung nung 2 buba State BJP Executive meeting alidang NPF dena yimtenren telok mashii ka nungi züngsemtemi party nung adentsü akok ta “Open door Policy” lemteta aliba nung State BJP Nagaland-i masetshii noktaka lir, ta sangdong nungsa nenshia metetdaktsü.