State BJYM-i lanur voters dang ajungshir

Kohima, Tsüklai 16 (TYO): Küm aika Nagaland nung nüburtemi ochimashi jenjang ajangshia aruogo, sorkar tashi maitba aser terenlok junga malibatem ajangshiogo, anungji BJYM Nagaland unit-i vote agütsütsüpurtem dang taruba election nungbo tashi tait sorkar kü kümteta yimjung aser terenlok aliba dang masü saka Nagaland nung mapa angutsü maongka aika adoktsü aser shisaliok reju tajung aika amenoktsü atema kanga shisa kaa vote agutsütsü ajungshir, ta tanü BJYM Nagaland-i sangdong ka nung metetdaktsü.
“Onoki Nagaland nung nüburtem dang, Narendra Modi-i dang pa mangdang ajanga India ya tashi tulu aliba linük ka kümdaktsütettsü, sorkar tashi tait agutsütettsü aser Nagaland nung azük-arudaktsütettsü ta angatetdaktsüner. Nagaland nung tang kanga rongdak nüngdaka aliba temelenshiji BJP-i dang bener arutsütettsü,” ta kasa sangdong ajanga metetdaktsü.
BJYM-isa senso ajak dang pei senti vote ji pei sasa dang inoktsütsü aser tangar melen vote meinoktsütsü mepishir, ta metetdaktsü.
“Voters temi terenlok aginer asü tashimait sorkar aser ochimashi aginer’ar telemtetba agitsü atema tang ya mapang tajung lir,” ta kasa sangdong ajangasa metetdaktsü.