State Congress-i kibok shia semdangtsü

Dimapur, January 19 (TYO): 2019 Lok Sabha election jakdang Nagaland state teraksatsüba tulu nungi kümzüktsü atema January 19, 2019 nü Nagaland nung Congress party-i kibok shia tua semdangba (Jan Sampark Abhiyan) sentong ka tenzükogo, ta tanü osang ka ajanga metetdaktsü.
Tanü Dimapur nung aliba Congress Bhavan nung 5th Ghaspani-II nungi taoba mapang candidate, KK Sema (Retd. IAS)-i outreach campaign ji tenzüktsü.
Congress Party ketdangsertemi, iba mapatong ya asentenshi mapatong ka lir aser iba mapatong nung züngsem ka akumba ajanga ajaki iba mapatong nung shilem agidaktsüner, ta ayongzük.
Ketdangsertemi ashiba agi, party nung inyakertemi kibok shia tua semdangtsü aser ajak dang party tangatetbatem nung ai-aura akaba den külemi party-i temelenshi osang metetdaktsüba maparen ajanga senso ajak ayimjemtsü asoshi tenla tajung agüja nungittsü mepishitsü.
KK Sema-i, kibok shia atuba ya nisung ajak ajurutsü atema maongka tajung ka lir; meranga meinyakra kecha mataloktsü, ta ashi.
“Iba maongka ya nija tajangzük angutsü atema masü saka ajak akhümketa aintsü aser tajung anogotem arutsü atema inyaktsüla,” ta paisa ashi.
“Party-i nüburtem tamang tanaben asentenshitsütsüla aser nüburtem den sendakteptsüla, iba denji külemi alima ainba den külemi tsüngkang medema jajatsüla,” ta paisa ashi.
Kasa sentong nung vice president, NPCC, incharge of Dimapur district, Jonathan aser taoba mapang AAP candidate, Akavi Zhimomi nungeria o tatsütsü jembia liasü.
Secretary, NPCC, Temjen Yanger-i okila jembia liasü.