State-i election nung BJP nem meyiptsütsü: Assam Speaker

Guwahati, February 03 (Agencies): Assembly menden nungi yimtenren o jembiba memesüki ka tanü Bodhbarnü Assam Assembly Speaker, Pranab Kumar Gogoi-i, taruba Assam assembly election nung state nüburtemi BJP nem dalang meyiptsütsü, kechiyong Ato kilonseri state onüktem sentoker, ta ashi.
House-i Ato kilonser dang, assembly nung ajaki melungtepa agizükba ama Central rongsenkettsüng inyakyim nung party ajak senden ka amentsü mepishia liasü, ajisüaka Modi-i telangzüba magütsüba ajanga Congress, AGP aser AIUDF ama state nung party balalai Modi aitsüba mapang ka nung Speaker-i iba o jembiogo.
“Party tebendang makai tanü House tensa apir ni bilemer, taruba election nung pai (Modi) dalang meyipa angutsü,” ta Speaker menden nungi Pranab Kumar Gogoi-i ashi.
Central inyakyim melenshiba ajanga Assam state-i sen crore 9,000 shi takoksa ajurutsü akok ta jembidang BJP Legislature Lenir Jadav Chandra Deka-i minprongba atema Speaker-i BJP lenira aitsüogo.
Speaker-i Deka dang, House nung party otongdar ka ama mebenshitsüla, kechiyong pai party otongdar ka ama kimalenbo osangbenertem den jembitsü akok, ta ashi.
Assembly züngsemtemi, Ato kilonser’er kima lungkak aittsü asü (?) ta asüngdangba langzüdang Speaker-i, “Asen temeten atema ni shinga danga teka amteper memepishitsü. Deka, kokra imlibilema nai ner tanishirtem dang shiang,” ta ashi.
Tesülen osangbenertem den jembidang Speaker-i, Union Finance Minister Arun Jaitley-i February 15, 2016 nü party ajak nungi züngsemtem den jembitsü mulunga lir ta shiogo, ajisüaka “Onoki minister (Jaitley) dang, iba onük nungbo onoki Ato kilonser den ang jembitsü ta shiogo,” ta metetdaktsü.