State jenjang atema Arvind Kejriwal-i March 1 nungi lumitsü

New Delhi, February 23 (Agencies): Tanü Aam Aadmi Party (AAP) tongti aser Delhi Chief Minister, Arvind Kejriwal-i, Delhi nem state jenjang agüjang ta takhangba agüja pai Mach 1 nungi tenzüka lumitsü, ta metetdaktsü.
“March 1 nungi tenzüka anogo telatet makai ni lumia takhangba agutsütsü,” ta pai ashi.
Tanü Delhi Assembly nung state jenjang onük nung o lemtepba mapang nung Chief Minister-i, Macrh 1 nungi pai lumitsü aser iba mapang nung nüburtem danga lumitsü asüngdangtsü, ta ashi.
“Delhi nung assembly menden 70 nungi onok nem menden 67 agütsüba ajanga iba yimti nüburtemi onok atema tuluka inyakogo. Onok jenjang maliasü saka ibaji ajanga onok Ministers aser MLAs kümdaktsüogo. Ibaji meyipja onok taküm samaaka ibaji tilaka dang asutsü,” ta pai ashi.
“March 1 nungi state jenjang atema mapatong tenzüktsü. Iba yimti ya state ka, ta mesangdong tashi ibaji manentsü,” ta Aam Aadmi Party tongti lenirisa metetdaktsü.
Delhi assembly kima osangbenertem den jembidang pai mener lumia longkak aittsü, ta metetdaktsü.
“Linük tesem ajak nung democracy mapa küma inyakogo, saka Delhi nungbo meinyak. Nüburtem votes ajanga sorkar ka shim, saka sorkar dak tashi mali. Anungji March 1 nungi onoki mapatong ka tenzüktsü, aser Delhi nem state jenjang magutsü tashi ni mener lumia longkak aittsü,” ta metetdaktsü.
Brihostibarnü Kejriwal-i taruba Lok Sabha election atema nüboyim tenzükogo, aser pai, par party-i menden 70 prongla nung takok ngura küm ana tsüngda Delhi state jenjang angutsü atema inyaktsü, ta nangzük.
Delhi kübok Azadpur nung senden ka nung jembidang Kejriwal-i, “Delhi nem state jenjang agutsüba anogo nungi küm 10 tsüngda ni Delhi nung alir ajak nem ki agutsütsü. Tanbo Ato kilonser (Modi) meshimtsüla. Delhi state jenjang angutsü atema vote agujang,” ta metetdaktsü.