State kübok district balala nung tesayurtem anogo among

Dimapur, September 05, 2017: Mongolbarnü tesayurtem anogomong nung Dimapur district nung “Common Teachers’ Day” Christian Higher Secondary School nung amongba sentong nung tongti tesemdanger, Dimapur Deputy Commissioner, Kesonyu Yhome-i award angur tesayurtem den külemi tangokba noksa ka angur. 

Dimapur, September 05 (TYO): Tanü state tesem ajaklen tesayurtem anogo kanga meraketa mongogo, iba den külemi Dimapur district nunga “Common Teachers’ Day” Christian Higher Secondary School, Dimapur nung ayonga among.
Iba sentong nung tongti tesemdanger o jembidang Dimapur Deputy Commissioner, Kesonyu Yhome-i, “Asenoki asen lokti reprangdangra tesayurtemi shilem tajung agia lokti atema tuluka inyaktetba angutsü,” ta ashi.
Paisa, “1951 küm asen state nung literacy rate ji shilem 10.5 dang liasü, ajisüaka tanübo 2011 census apidangra, literacy rate shilem 79.5 tashi kümogo. Iba ya ajanga tesayurtemi shilem tajung agiba sayur,” ta metetdaktsü.
Tesayurtem nem tenüngsang agüja pai, “Nenoki asen lokti azüng-zülu memeteti aliba meteta kümdaktsüogo. Taruba küm 50 tsüngda asen lokti nung tesayurtem atema tayongzükbaji, lokti nem tangatetba agütsütsü asütsü. Tarutsü nung tayongzükbatemji tesüiba mapangtem ama masütsü, kechiyong azüng-zülu metetba ajanga dangbo yimjung, terenlok aser azükaru bener marutettsü, anungji iba nungji tesayurtemi shilem tajung agitsüla,” ta ayongzük.
Sentong nungsa nija aser sorkar school balala nungi tesayur 20 nem award agüja liasü.
Mokokchung: Tanü Mokokchung district nunga Ao Students’ Conference (AKM)-i ayongzüka 56buba tesayurtem anogo among.
Tetushi tejaoker o jembidang Rtd. Commissioner & Secretary, Nagaland Government, Thangi Mannen-i, tebilemtsü balala atema lenmang sayurtemji tesayurtem lir, anungji kaketshirtemi tesayurtem dang nungi angazükbaji taküm tepiyong atema asutsü, ta ashi.
Laisa, tesayuba mapa nung khuret aika lir, anungji tesayurtemi tensa den apet angazüka tesayuba agütsütsüla, ta ashi.
Sentong nungsa ADC & Administrator, Mokokchung aser Dy. DEO, Mokokchung-ia jembi. AKM Tiri okila jembi aser Rev. Ponen-i sarasadema liasü.
Iba sentong nung AKM-i tesayur 9 nem District Teachers Award agütsü aser Ao Senden Literature Board-ia kaketshir pezü nem IMF Award agüja liasü.
Tuensang: September 5, 2017 nü Tuensang District nunga Govt. Higher Sec. School Auditortum nung tesayurtem anogo among.
Sentong nung jembidang CBLT Executive Secretary, A. Jonathan-i, iba anogomong ya ajanga tesayurtemi kaketshirtem dang nendaka sayuba taliba shisanger, iba den külemi tesayurtem dang temeim aser akhümtsübu sayua iba anogomong amonger, ta metetdaktsü.
Sentong nung KBC Pastor Tuensang, S. Mono-i sarasadem aser SDEO, Noklak, Marnungba-i tepela anküp o jembia liasü.
Zunheboto: Zunheboto district nunga tanü tesayurtem anogo among, aser iba sentong nung tongti tesemdangerji, SDO (C) Sadar, Temjennaro Longkumer liasü.
Iba sentong nung tesayur 10 nem District Level Teachers’ Award agütsü.
Mon: Tanü Mon District nunga Department of School Education-i ayongzüka tesayurtem anogo among, aser sentong nung tetushi tejaokerji ADC, Mon, C. Shanavas, IAS liasü.
Sentong nung jembidang pai tesayurtem dang kaketshirtem mebendangi kasa meima sayutsü ajungshiba den kaketshirtem danga tesayurtem meima akhümtsübutsü ayongzük.
Longleng: Tanü Longleng nunga Department of School Education, Longleng District-i ayongzüka tesayurtem anogo among aser iba sentong nung SDEO, Longleng, S. Bendang Longkumer-i iba anogo teratet metetdaktsü.
Sentong nung Headmistress GHSS, Longleng, A. Shamthai-i tesayur 8 nem District Teachers Awards agüja liasü.
Pfutsero: Tanü Pfutsero jila nunga Pfutsero Town Schools Association (PTSA)-i tesayurtem anogo ayongzüka among, aser iba sentong nung tongti tesemdangerji Environment, Forest & Climate Change Minister, Neiba Kronu liasü.
Tesayurtem nem tenüngsang agüja state Minister Neiba Kronu-i, lokti atema tesayurtemi mapa tajung inyakbaji mamatoktsü, ta ashiba den külemi paisa, tesayur mapa ya ajanga kaketshirtem dang masü saka tesayurtema tajangzük angur, ta metetdaktsü.
Paisa kaketshirtem dang tesayurtem akhümtsübutsü ayongzüka liasü.
Jalukie: Tanü Baptist High School aser Government Higher Secondary School, Jalukie-i tesayurtem anogo peipei school nung mongogo.
Iba anogomong nung school anaprong nung kentenmenü, tsüngsang, kijai atenba ken aser fashion show agia liasü.