State Level DISHA Committee senden amen

Dimapur, Rongjui/Sept. 02 (TYO): State Level DISHA Committee senden ka August 31, 2022 nü Chief Minister’s Office, CMRC, Kohima nung mena state nung department balala kübok terenlok maparen indang jembishinüa liasü.

Nagaland Chief Minister Neiphiu Rio, shiba State Level DISHA Committee nung mendenpuba lir, pa lenisüba kübok iba senden ya mena liasü aser pai iba senden nung adener ketdangsür aser tongtipang nisungtem pela agizüka liasü.

State nung Centrally Sponsored Scheme (CSS) tem inyakba mapang sorkar department ajaki tim lenmang (Advisor/Minister) ajanga proposal yoktsüla, ta pai metetdaktsü.

Chief Minister-i department tem dang shisatsü shidak agiteptsü ajungshi aser department balalai sentong balala inyakba indang tongmelang agi rateta ashi.

Union Finance Minister-i CSR Conclave mapang jembiba indang athishia department ketdangsür dang bendanga agütsür inyaktsü ayongzüka liasü.

Minister, Rural Development aser State Level DISHA Committee indang Co-Chairperson, Metsubo Jamir-i iba senden nung tarur pela agizükba o jembi aser department balala dang scheme ajak tajungtiba nung inyaktsü ajungshia liasü.

Member of Parliament, Rajya Sabha aser State Level DISHA Committee züngsem S. Phangnon Konyak-ia iba senden nung jembi aser scheme balala agi nüburtem ajangzükdaktsütsü indang jembia liasü.

Iba senden nung tongtipang department tuko (9) – Social Welfare, School Education, Health & Family Welfare, Works & Housing, Rural Development, Agriculture, Urban and Municipal Affairs, Power aser PHE ajanga FY 2021-22 aser 2022-23 mapang takok ngua inyaktetba aser CSS sentongtem inyakba mapang timtem ajuruba indang lemsatepa liasü.

Chairman ajanga department tem dang Government of India den jembitsüsa tetsükdaktsü ajuruba tem pa dangi bener arutsü ashi aser state indang Member of Parliament ana nem metetdaktsütsüla, ta ashi.

Secretary, Rural Development Department aser Member Secretary, State Level DISHA Committee, Neposo Theluo, IAS ajanga melepzüng o jembia iba senden tembanga liasü.