State level National Deworming Day tenzükogo

March 10, 2017 nü Northfeild School, Kohima nung National Deworming Day anogomung nung tanur ka nem Vit-A albendazole mozü chidaktsüba noksa nung angur. 

Kohima, March 10 (TYO): March 10, 2017 nü Kohima nung 2017 National Deworming Day mezüngbuba shilem Director of H&FW, Dr. John Sweyievisa-i Northfield School nung tenzüktsüogo.
Tanü iba sentong nung okilaa jembidang Dr. John Sweyievisa-i, National Deworming Day (NDD) ya anogo ka telatet lir, aser iba mapang nung school aser anganwadi centres sabangtem ajanga tanur arishi küm 1 nungi 19 tsüngdapur dak rangloker dar nung aliba mesen/tsüla (Soil Transmitted Helminthiasis) mozü agutsür, ta metetdaktsü.
Paisa, 2020 küm tashi nungbo tanurtem dak mesen/tsüla aliba ajanga temang nung timtem meshimeshia samatsütsü nükjidong nung World Health Organisation (WHO)-i “school tanurtem aser pre-school nung tanurtem” dak rangloker inyaktsü tuyua lir, ta metetdaktsü.
India sorkari NDD ajanga tajemba agi tanur shilem 90 ayimjemtsü nükjidong yur inyaker. WHO-isa India nung arishi küm 1-14 tsüngda tanurtem shilem 65 bo tsüla atemtsüsa lir, ta ashi.
Pai ashiba agi, tanurtem dak tsüla aliba ajanga tanurtem anemia, temang tashi maitba, nutritional impairment, chi manangba, tebok angoba, saaktsüba, tebok aoba den külemi aser temang touzük ajema kümdaktsür.
Item ajak nokdangtsü atema mozü süngjang ka- albendazole chidaktsür aser ibaji ajanga tanur temang anema lidaktsür.
Iba programme ya Health & Family Welfare, Department of School Education aser Women & Child Development (ICDS) yaritepa inyaker, ta paisa shisem.
Iba programme ajanga ajangzüktsüpurtemji arishi küm 1-19 tsüngdapurtem: sorkar aser sorkari yariba school nung tanurtem, nija school tem nung tanurtem, anganwadi centres nung pre-school tanurtem, school mazünger tanurtem lir.
Deworming day nü school aser anganwadi centres nung iba mozü mechiteter tanurtem atema de-worming mop up day ji March 15, 2017 nü akatsü.
Tanü iba sentong nung mendenji State Programme Officer, Director of H&FW, Dr. Bendangla Longkumer liasü aser Mission Director, NHM, Dr. Bendangyanger Jamir-i tepela anküp o jembia liasü.