State level Parliamentary Quiz & Youth Parliament competition 2015 agiogo; Lanur nem loktiyimten angatetdaktsütsü atema iba sentong agir : Kiyanilie

Dimapur, October 30 (TYO) : October 30, 2015 nü Capital Convention Centre, Kohima nung State level Parliamentary Quiz & Youth Parliament competition 2015 agiogo.
Iba sentong nung tongti tesemdangerji Social Security & Welfare and Parliamentary Affairs Minister, Kiyanilie Peseyie liasü.
“State Level Youth Parliament competition aser Parliamentary Quiz sentong ayonga agibaji lanur nem loktiyimten angatetdaktsütsü atema lir. Loktiyimten inyakyim nung public-i bilemba lemsateper aser sorkar ka ketdangsüa aotsü atema ozüng angudakji public tebilembatem lir” ta tanü Kiyanilie-i o jembidang ashi.
1962 küm 4 buba All India Whip’s Conference alidang committee-i sorkar dang shisaluyimba rejutem aser panchayats nung mock parliaments (tang youth parliament) ya alitsüla kechiyong iba ya ajanga lanu putu nem loktiyimten tangatetba sayur ta tebilemba lemsatep, ta Minister-isa metetdaktsü.
Tanüngba rejutemia kaketshirtem ajangzükdaktsütsü atema kaket shisatsü agütsüba den külemi iba sentong ayongzüka agitsüla, ta Kiyanilie-isa ashi aser paisa Education Department dang pelaba metetdaktsü.
Sentong nung mendenji nung Evothung Ezung liasü, Secretary Parliamentary Affairs & Law & Justice, K.N. Chishi-i tesentepertem pela agizül aser Eunice Alinger-i anküp tepela o jembi.
Parliamentary Quiz 2015 Competition nung Dimapur district-i mezüngbuba jenjang takok angu, Kohima district-i tanabuba aser Phek district-i tasembuba jenjang takoktem angu.
Youth Parliament 2015 nung Peren nungi Thoidambo-i mezüngbuba jenjang, Kohima nungi Thurnoralü-i aser Mokokchung nungi Salangyala nati tanabuba jenjang aser Wokha nungi Michael Th. Lapon o Zunheboto nungi Hikugha H. Wotsa nati tasembuba jenjang takoktem angu.