State lockdown ozüng nung aibelener shinga meliasü

Dimapur, Monupii/May 21 (TYO): State nung May 21, 2020 nü lockdown nung aibelener shinga meliasü, ta anogoshi temzüng ozüng aser nüngdakba osettsüset agütsüba indang osang sangdongba nung shia lir.
Sangdong ajanga ashiba agi, MV Act indang section balala kübok gari 370 dang senchi achi aser iba mapang senchi sen 60,520 saruteta liasü.
Wokha daka alaka district ajunga nung nüngdakba osettsüset agütsüba, jang-o-tzü aser aonsotsü/mamatzü ayokba dokan tem ajunga lapoka liasü, ta Home Department ajanga ashi.
District ajunga nung mozü ayokba dokan tem lapok aser state nung nüngdakba osettsüset agi meperiba osang kecha meliasü.
Electricity, telecom, medical amala nüngdakba agütsür senzüsempongba nokdangba meliasü aser manufacturing unit nung inyaker, nüngdakba osettsüset lemtsüba commercial vehicle aser e-commerce sadema senzüsempongdaktsü, ta sangdong ajanga ashi.
COVID-19 mechi tenokdangba balala agüja aliba ajanga kongshia alir aayangertem nem chiyongtsü aser tejenokdak tesem agütsütsü atema nüngdakba achayanga liasü.
Iba dak sendakba nung tang state nung relief camp pezü lir, kong tesem balala nung aayanga jajar nisung 150 yua lir. Ano food camp ana nungi anogoshi aayanger/nüngdakbapur nisung 500 dak tema nem chiyongtsü aser dry ration agütsüogo, ta kasa sangdong ajanga ashi.