State nung June 7 nü Law & Order nung aibelener meliasü

Dimapur, Aami/June 08 (TYO): Kezekie, Kohima nung aliba State Emergency Operation Centre COVID-19 Control room ajanga state nung June 7, 2020 nü Law & Order dak sendakba osang sangdonga liasü. Joint Secretary to the Government of Nagaland, Hiazu Meru-i ashiba agi, state tesem ajungalen tzüzüng-ozüng agüja alibatem nung aibelener shinga meliasü.
Nagaland nung aliba district ajunga nung jang-o-tzü, aonsotsü, mozü aser mamatzü ayokba dokantem lapok. State nung jang-o-tzü, aonsotsü, mozü aser mamatzü amala agi meperiba osang kecha meliasü, ta sangdong ajanga ashi.
Electricity, telecom facility, medical amala tongtipang service agütsür aser manufacturing unit tem nung inyaker, nüngdakba oset belenba aser e-commerce garitem senzüba nokdangba osang kecha meliasü.
COVID-19 mechi tenokdangba agüja aliba agi kongshir alir, talisa tesem balala nung ayanga jajartem nem chiyongtsü aser tejenokdak tesem agütsütsü asoshi state sorkari achayanga liasü. Tang active relief camp ka aser active food camp ana, Kohima nung ka aser Dimapur nung ka amenoka lir, ta sagdong ajangasa ashi.