State nung mepetmesü adokdaktsüba atema GMP puri IPTF dak atong

Agatarla, September 20 (Agencies): BJP pur tajungshiba nung taoba ghonda 24 tsüngda nung Tripura tesem balala nung Indigenous People’s Front of Tripura pur tassa nung mepetmesü balala adokdaktsüba atema Tripura Rajya Upajati Ganamukti Parishad-i IPFT pur aitsüogo.
“IPFT puri parnok atema linük balaka akhangba maparen ya tribal aliba tesem tem nung tera jilaa kümdar, aser parnok tamakok ya minbangtsü atema parnoki iba mepetmesü ya ajungmeso,” ta GMP ketdangser kati ashi.
“Tipraland ka tenüng nung IPFT puri lisopurtem anisatsü merangogo, saka shidakba nungbo parnoki joko lisopurtem mazüokteti kümogo, aser iba ya mimbanga ayutsü atema parnoki BJP teyari nung iba mepetmesü ya ajungmeso,” ta GMP lenir Biswamani Debbarma-i osangbenertem dang ashi.
Kasaji iba tatalokba ya, agizüktsümakokba ka aser undemocratic, ta shia CPM puria aitsüogo. Parnoki ashiba agi, iba mepetmesü ya state nung telungpuri timtem agüja aruba bilemtetshia, state süngjema medoktsütsü asoshi animeso.
“IPFT puri mepetmesü adokdaktsütsü asoshi jilia tasa asaba ajanga lisopurtemi GMP pur tali sapua jangjaa akümba ajanga parnok tsübuba sayur. Iba ajanga parnoki GMP rally nung timtem adokdaktsütsü asoshi iba maparen inyak. Ajisüaka GMP pur tesem balala nungi arua iba sentong nung shilem agiogo,” ta Haripada Das-i ashi.
Kasa mapang nung IPFT puri GPM puri iba mepetmesü ya tenzük ta aitsüogo. Parnoki ashiba agi, GMP puri tamasa parnok indang gari ka raksatsü.
“IPFT pur Mongolbarnü Khowai nung convention liasü. Onok pusemertem iba sentong nung adentsü asoshi oya aliba mapang nung GMP pur gari kati IPTF pur mena aliba gari ka dak arua atsük. Iba sülen parnok tsüngda olangtep tenzük aser mapang tstsüka lir teka sangshia züktep tenzük. IPTF puri iba ya atalokdaktsütsü asoshi kecha terenemshiba meliasü. GMP pur dang masü saka tangara aika yiruogo,” ta IPFT tekolakba NC Debbarma-i ashi.