State nung mezüngbuba ‘Fitness & Strength War’ Nov. 4 nü akatsü

Dimapur, October 28 (TYO) : Lanurtem temang nung tashi aitsü atema training agitsü asoshi ajungmesotsü nükjidong nung Universal Gym-i Nagaland nung tan mezüng süa Nagaland tesem ajak nungi shilem agitettsüsa ‘Fitness & Strength War of  Nagaland’ sentong Sakus mission College Campus nung Hokolbarnü, November 4, 2016 anepdang 9.00. ako nungi tenzüktsü akatsü ayonga lir.
Iba amala tetoktep ya state nung tan mezüng ayonger asütsü aser iba sentong nung telemsa balala nung tashi toktepdaktsütsü. Iba sentong ya Bendang Imchen, Yanger,  Meren Jamir aser Sentiba nungeri apitetba lir.
Iba tetoktep ya anogo khenü nung tembangtsü aser takok angur nem sen 20,000, 1st runners up nem sen 10,000 aser 2nd runners up nem sen 5000 agütsütsü renema lir. Mezüng, tanabuba aser tasembuba jenjangtem nung takok angurtem nem trophy kaka den kuli kaketa kaka agütsütsü.
Fitness & Strength war tetoktepba nung (1) Bench press (2) Deadlift (3) Burpees or Pull ups aser (4) Squats telemsa nung toktepdaktsütsü.
Telemsa pezü ajanga aso tila aser tulu pur ajak nem takok angutsü maongka sakuku agütsütsü.
Iba tetoktep atema temzüng ozüng kecha balaka tasak mali saka na Fitness & Strength War nung shilem agitetogo ta asübaji tadener atema tuluka asütsü.
Iba tetoktep nung mapang tatsütiba agia telemsa pezü prong koktetba nung ajemdaker repranga points agütsütsü.
Lepshia merangdangba atema tetoktepba nungi manendaktsütsü kechiba süra item tetoktepba nung mapa ang tongtibang. Ajisüaka tetoktepba ka tembanga meinyaktetba ji surrender asüba ama züngshitsü aser tanabuba tetoktepba nung shilem magidaktettsü.
Iba tetoktepba atema metetpelatsü aser tenüng agütsütsü asoshi phone number +91-7005-645-565 aser +91-9856-892-437 tem nung call asünung ajungtsü.