State nung nüburtemi arem wazüka ayutsüla: Neiba

Kohima nung August 17, 2017 nü Minister, Neiba Kronu den Environment, Forest & Climate Change ketdangsertem aser staff tem külemi tangokba noksa nung angur. 

Kohima, August 17 (TYO): Brihostibarnü Environment, Forest & Climate Change Minister, Neiba Kronu-i state nüburtem dang tangatetba tajung nung state nung arem kümzüka aser wazüka ayutsüla, ta metetdaktsü.
Minister-i Principal Chief Convertor of Forest, I Panger Jamir aser Department ketdangsertem ajurua shisa lemsatepba mapang nung Kronu-i, “Arem kümzüka aser wazüka ayutsü atema asenok dak tangatetba tajung alitsü nüngdak,” ta metetdaktsü.
Ali atsünga agirtem dang nungi arem kümzüka ayutsü atema asalentong tajung nüngdak, ta paisa metetdaktsü.
Minister-isa, “Terenlok atema gari lenmang aser power sector temji kanga tongtibang, ajisüaka meimchir taküm alitsü atemabo arem wazüka ayutsüji kanga tongtibang aser sendaktepa lir, anungji asen meyong arem kümzüka aser wazüka ayutsüla,” ta metetdaktsü.
Tangari senotsü agi yariba programme aser Foreign Direct Investment (FDI) ajanga Department-i inyakba mapatem ajungkettsü, ta shia Minister-i, “State nung yimtsüng 185 kübok arem hectare 79,000 nung arem chipoka alu ayimba ajema akumtsü atema Japan International Cooperation Agency (JICA)-i sen crore 533 agütsü, aser ibaji ajanga state nung arem tulu wazüka yutettsü,” ta ashi.
“Nagaland ya state tilaka dang lir, saka tanga state aika dang nungi biodiversity nung takarba lir, alimai asenok meteta akumtsüsa asenoki inyaktsüla,” ta paisa ayongzük.
Minister-i department ketdangsertem dang süngdong lensükba aser ozüng alema süng arangba mill mittsü, iba den külemi arem aser arem shiruru kümzüka ayutsü ayongzük.
Kronu-isa, department tejakleni aotsü atema pai akokba tashi department den yariteptsü ta ashiba den külemi department dang amalitepa inyaktsü ayongzük.
Environment, Forest & Climate Change Principal Secretary, L. Kire leniba nung shisalemsatepa liasü, aser kasa sentong nung district division ajak nungi ketdangsertemi parnoki inyakba mapatem power point presentation ajanga lemsatepa liasü.