State nung Technical Services training agir

Kohima, May 04 (TYO): State nung tang mezüngbuba technical services atema induction training May 04, 2017 nü Multipurpose Hall, ATI nung tenzükogo, aser iba sentong nung tetushi tejaokerji Nagaland Chief Secretary, Pankaj Kumar, IAS liasü.
Iba sentong nung jembidang ATI Director, Lithrongla G. Chishi, IAS-i, iba training programme ya Chief Secretary-i benokba project ka lir ta metetdaktsüba den külemi technical services atema training atangji nung katetba atema lai Chief Secretary nem tenüngsang agütsü.
Training balala, talisa state nung technical training agütsütettsüsa shisaliok agütsürtem agi anüngba atema tesasaba olen ka nung lai Heads of Departments ajak dang ketdangsertem yoka ATI indang training balala nungittsü ajungshi.
ATI-i department aser lenla balala nungi züngsemtem nem training agütsüba khuret abentsü, ta shia lai, iba induction programme ya ajanga sorkar mapa inyakertem takoktet adokdakja state nüngdak peritsü imlar, ta ashi.
Tebilemba onük ka lemsatepdang lai, P&AR Dept-i Dept. ajak dang NPSC tatidang ajanga ketdangsertem shimtsü metetdaktsütsüla, ta ashi.
Iba sentong nung Chief Secretary-ia, iba induction training ajanga ketdangsertemi inyaktsü shilem aser parnok dang nungi imlaba mapatem parnoki angatettsü, ta ashi.
Paisa, iba ya ajanga parnoki angazükba aser field nung teinyaktsü na tsüngda angatettsü, ta ashi.
Common induction programme teratet metetdaktsüdang pai, item ama programme ajanga ketdangsertem tsüngda tesendaktep yangluba nung yaritsü, aser ibaji ajanga dept balala tsüngda amalitep ajungkettsü, ta ashi.
“Iba training ya ajanga training agirtemi ozüng, telatetbatem aser inyakyim balala rajema akumtsü,” ta paisa shisem.
Iba sentong ya Additional Director (Admn) ATI, Kevekha Kevin Zehol, NCS leniba nung agi aser paisa training agirtem pelaa agizüka liasü.