State nung temzüng ozüng dak sendakba osang

Dimapur, Chiteni/July 1 (TYO): State Mokdanger aliba mapang temzüng ozüng tsütsü aser tenündakba oset belenshiba aser mapa balala indang osang Secretary to the Government of Nagaland, Hiazu Meru-i agütsüogo. July 1 nü tashi nung state mokdanga aliba mapang tetuyuba sülen manidakba atema nisung ana sota senchi sen 200 (nisungshia) chiogo. Mask semer senzütsü tetuyuba agütsü aliba sülen manidakba atema tena dang senchi chia liasü, ta metetdaktsü.
Osang ajang ashiba agi, Mokokchung dak alaka district ajak nung tenüngdakba oset ayokba dokantem ajak lapoka lir aser state nung tenüngdakba oset agi anüngba osang tang tashi nung kecha agüja mali.
Maneni tenüngdakba oset belenshitsü aser e-commerce agents tem senzüsenpongtsü asoshi kecha tenokdangba agüja mali, ta metetdaktsü.
COVID-19 ajanga state mokdanger aliba mapang bendanger aayangertem nem chiyongtsü aser tejenokdak agüja arudar aser relief/shelter camp ka aser food camp ka ajanga tenüngdakbapurtem nem chiyongtsü agüja arudar, ta kasa sangdong ajanga metetdaktsü.