State nung tesayurtemi akhangbatem CNTC-i nungiter

Kohima, Mongputeni/Oct. 04 (TYO): All Nagaland Adhoc Teachers Group (ANATG) 2015-i pay scale akhangba ama sorkari agizükba atema pelar, ta shia Central Nagaland Tribes Council (CNTC)-i state nung category balala kübok tesayurtemi ajangshiba timtem balala atema tebilemtsü katsür, ta metetdaktsü.
CNTC-i sorkar dang nangzükba ama atangji mapa küma inyakdaktsüner, ta Media Cell, CNTC-i sangdong ka nung metetdaktsü.
“Nagaland nung category balala kübok tesayurtemi parnok timtem ketdangsertem nem metetdaktsütsü atema democratic yimya nung longkak aittsüsa akumer. Tesayur mapa ya akhümket mapa ka lir aser alima nung linük yangertsürtem lir ta aikati züngshir, ajisüaka asen state nung metokmeperi aser inyakyim majungba ajanga tesayurtem aika timtemba ngua jashir,” ta CNTC sangdong nung shia lir.
Iba dak sendakba nung CNTC-i sorkar dang tekaratiba nung ANATG 2015 appointment regularize sütsütsüla, kechiyong parnoki suitability tests takok nguogo aser Cabinet approval dang atar, ta ashi. CNTC-isa 2016 batch RMSA tesayurtem itasen katitsütsü mesüra mapa nungi anentsütsü atema züluba shidi ngua aoksar, ta ashi. Item tesayurtem nem itasen mapang shidak nung magutsür mesüra menotsür, ibayongji parnoki timtem kanga ajurur, kechiyong anogoshia osettsüset/chiyungtsü jenjeng atur, aser libalirotsü tasakba akumer, ta shia CNTC-i sorkar dang tesayurtemi akhangbaji süoki ia agidaktsüner, ta mepishia metetdaktsü.