State nung yi dokan 500 shibangtsüogo: TN CM Palaniswami

Chennai (Tamil Nadu), February 20 (Agencies): Tanü tang Tamil Nadu nung Chief Minister tasenba, Edappadi K. Palaniswami-i state nung yi ayokba retail outlets 500 shibangtsüba osang sangdongogo.
Taoba AIADMK tongti lenir aser taoba state Chief Minister asür, J Jayalalithaa-i mapang telemsa yur state nung yi nokdangtsü nangzüka liasü, aser iba tenangzükba dak sentakba nung item yi dokan shibangtsüogo.
Taoba hopta Palaniswami Chief Minister menden atema tenangzükba agiba sülen tang mezüng osangbenertem senden nung jembidang pai iba osang ya metetdaktsü.
2016 küm May ita nung taoba Chief Minister Jayalalithaa-i state indang TASMAC-i ketdangsüba Indian Made Foreign Liquor (IMFL) retail outlets 500 shibangtsütsü, ta sangdonga liasü.
Lai iba ya assembly election nüboyimba mapang nangzükba rongnung ka lir.
Palaniswami Chief Minister akumba sülen pai mezüng tetuyuba pongu agütsüba rongnung yi ayokba outlets 500 shibangtsüba ya densema lir.
February 16, 2017 nü Chief Minister menden atema Palaniswami tenangzükba agiba sülen anogo ana lir assembly nung ‘confidence vote’ ajanga parnoki takok angu.