State Pongu Exit Polls

India nung nütsüng timtiba aliba state, Uttar Pradesh densema India Union kübok state pongu nung assembly election agiba tembangogo. Tanüngba state pezüji Punjab, Manipur, Goa aser Uttarakhand state tem liasü. Item states assembly election ya BJP atema kanga tongtibang liasü, kechiyong BJP-i aniba NDA sorkari yaküm ‘demonetization’ telemtetba agiba sülen tang mezüng assembly election agiogo. Anungji election osang ajanga nüburtemi Narendra Modi-i aniba BJP dak maneni tamang akar asü makar, ibaji asadangtsü. State ajak dak alia BJP-i UP nung takok ngura ibaji ajanga Centre nung BJP-i aniba NDA sorkari tanüngba küm ana ser tesadang nung temelenshi aika benoka inyaktettsü. Ano külen taküm July 25 matongdangsa Tir Election-a agitsü, kechiyong iba anogo nung tang Tir teinyakdak, Pranab Mukherjee kümsük tembanger. Anungji BJP-i shimba nübo ka Tir akumtsü atema-a assembly election ya kanga tongtibang liasü. Tang presidential electoral college nung BJP votes lakh 3.80 jungnüa lir aser Tir election nung takok angutsü atema vote lakh 5.49 atongtsüla, anungji ano party-i vote lakh 1.7 nüngdaker. Centre aser state tem naprongla nung BJP-i aniba teloktep party tem vote lakh 1 dak tema lir, anungji parnoki maneni vote 70,000 bo nüngdaker, ibayongji assembly menden 403 aser presidential electoral college votes 83, 824 aliba state, Uttar Pradesh nung assembly election ya BJPy atema kanga tongtibang liasü. Uttar Pradesh assembly election nung BJP-i menden aika nung takok ngura Modi sorkari nüngdakba vote 70,000 ji angutsü. Iba den külemi Punjab nungbo BJP-i tamakok angutsüsa jenjang ka nung lir, anungji parnoki UP nung menden aika nung takok angutsüla. Tir election nung takok angutsü atema Modi sorkari tanüngba vote atema AIADMK dang nungi teyari meshitsüa akok. AIADMK menden ajak agi 50 (Lok Sabha nung 37 aser Rajya Sabha nung 13) lir, ibaji electoral college nung vote 35,400 lir. Iba dak alia Tamil Nadu Assembly nung MLA 135 indang vote ji 23,760 lir. Maneni tan agiba assembly election ya BJP atema 2019 küm Lok Sabha election asoshi kanga tongtibang liasü, kechiyong parnoki item state kar nung takok anguba ajanga taruba Lok Sabha election atema jenjang tajungba akumtsü. Tawa state election indang exit polls osang tanü nikongdang nungi sangdongdar. Yaküm küm April-May ita nunga state pongu nung Assembly election agia liasü, iba sülen exit polls osangji timbaka shitak liasü, kechiyong Assam nungi BJP-i takok angutsü, Kerala nung Left Democratic Front-i aser Puducherry o West Bengal nung Trinamool Congress-i takok angutsü ta asadangtetbaji shitak liasü. Ajisüaka Tamil Nadu exit poll osangbo khenyongi tai liasü, kechiyong exit poll aika ajanga DMK-Congress teloktepi takok angutsü aser taoba CM, asür Jayalalithaa’er AIADMK party-i tamakok angutsü ta asadangtet ,saka AIADMK-i menden 136 tashi nung takok angu. Ajioda tanü exit poll balala ajanga Uttar Pradesh nung BJP-i takok angutsü, Uttarakhand nunga BJP-i takok angutsü, Manipur nunga BJP-i takok angutsüa akok, Punjab nung Congress mesüra AAP-i takok angutsü aser Goa nungbo shingaia majority mangutsü ta asadangtetogo, saka iba osangji March 11 nü vote azüngba sülen ang jangjatsü. Exit polls osang ya shitak dang asü nungbo 2019 küm Lok Sabha election nunga Modi leniba nung BJP-i sorkar akumtsüa akok aser Congress Party tang aliba jenjang dang nungi ano tamajungba akumtsü. Iba dak alia 2024 Lok Sabha election nungbo Congress lenir Rahul Gandhi arishi küm 54 asütsü, iba tetezü pai yimtenren nung takok mengui küm 20 tashi süidaktsür asütsü, iba den külemi Sonia Gandhi-a arishi kanga tain küma India yimtenren nung joko yakbang süa shilem magitettsüa akok aser Congress party mapang talangka shia marutettsü südi.