State sorkar nem Delhi police agütsütsüla: Arvind Kejriwal

 

New Delhi, October 20 (Agencies): Tesüiba hopta ishika linük yimtiba Delhi nung tanurtem aser tetsürtem anema inyakba tatalokba aika dak sentakba nung tanü AAP tongti lenir aser Delhi Chief Minister, Arvind Kejriwal-i maneni Delhi Police aser Anti-Corruption Bureau (ACB) ji state sorkar nem agüjang, ta khangogo.

Tang Delhi police aser ACB ya Centre sorkar kübok lir.

Tanü Kejriwal-i twitter ajanga, “Modi, yimlibilema na tekong kanga merangbaji tokjang, aser asenok senteper inyakdi. Delhi sorkar nem police aser ACB agüjang. Onoki küm ka tsüngda kechi inyaktsü’ar sayudi,” ta ashi.

Tawa CMS survey nung ajemdaker Kejriwal-i, Delhi nung ochimashi mapa kanga ajema kümogo aser iba den külemi administrative tashi aitba aser AAP sorkar nükjidong nguogo, ta ashi.

Iba survey ajanga Delhi police ya kanga ochimashi ta sayuogo, ta paisa ashi.

Delhi police ya state sorkar nem agütsü nungdang yimti nung temzüng ozüng shitak benoktettsü aser tetsürtem kümzüka alitsü, ta Kejriwal aser par party-i aiben jembia arudar.

Taküm March ita Delhi assembly election nung AAP -i takok tulu ngua sorkar tashii aruba sülen Centre sorkar aser AAP sorkar na tsüngda mangatettep aiben adokogo.

Kejriwal-i, Delhi Lieutenant Governor Najeeb Jung’er office ajanga Centre-i state inyakyim nung amoshiner ta tai tongloktsü, ajisüaka Centre-ibo aji oda masü, ta shiogo.

Tawa-tanü ka nungi Kejriwal-i Congress aser BJP nung masüba yimtenren lenir Mamata Banerjee aser Nitish Kumar nunger ama den senden mendagi.

Tan Bihar assembly election nunga Kejriwal-i Nitish pusemba sangdongogo.