State sorkar nem sen peria magütsüba ajanga gari lenmangtem anepalu mesüteter: PWD(R&B) Minister

Kohima, May 20 (TYO): Sorkar ket nung gari lenmangtem yanglushitsü atema sen peria maliba ajanga lenmang mejungi lir, ta PWD (Roads & Bridges) Minister, Y Vikheho Swu-i ashi.
“India sorkari gari lenmang tasentem yanglutsü atema dang sen agütsür, saka lenmang yanglua alibatem yanglushitsü aser anepalutsü atema sen magütsür, aser lenmang tasentem yanglutsü agütsüba sen nungi agiteta mamshiteter,” ta paisa ashi.
“2014 jakdangbo special category kübok state sorkar nem sen peria lemzüktsü. Saka special category funding agienba sülen, timtem tuluba ajurubaji PWD (Roads & Bridges) dept. lir. Gari lenmang anepalutsü atema taoba mapang crore noklang ana nungi asem nguyaa aliba yaküm nungi sen crore 40 dang angur,” ta Vikheho Swu-isa metetdaktsü.
Nagaland nung aliba gari lenmang timba ka PWD R&B kübok lir aser tanabuba nung PWD National Highways kübok lir. Ano, urban roads ta ser Urban Development-i kar achaayanger, kar municipal kübok, kar BRO, aser kar General Supply roads (GS) lir aser itemjibo Army ajanga repranger, ta paisa shisem.
Nagaland nung department troki gari lenmangtem achaayanger aser ano yimtsüngtemi pei pei telongtet nung aliba lenmangtem repranger aser ibaji Roads & Bridges dept. kübok bener aittsü makoker, ta Vikheho-isa metetdaktsü.
“Anungji, kija mesüra teloktemi gari lenmang majungba indang metetdaktsüdang, tamasa koba department mesüra ketdangsertemi lenmangji anepalur’ar metettsüla. Ano, Telecom, PHE amala line department temia PWD dang nungi temelaba magii cable aser pipe lines atema lenmang tusatsüba ajanga lenmangtem raksar,” ta paisa shisem.
Minister-isa ashiba agi, lenmang kar nung tezülen kilentzü aodak lir, saka tia maka public-i kilentzü aodak jana mashii endokba ajanga tangbanger aser iba jagi lenmang raksar.
“Talisa, ali kiburtem onük ajangaa gari lenmangtem tia mejungi lir. Ali kibur kari pei li nung tangar nem gari lenmang dena terenlok mapatem meinyakdaktsür aser iba jagi tetsükdaktsü ajurur. Küm aika tejakdang, Nagaland nung district headquarters aser jilatem kümtet aser iba mapang ali kiburtemi tajangzük agiba sülena, tanü tashi asenoki ali kibur indang khuret ajurur. Ali kiburtemi terenlok atema inyakba mapa nung Naga nunger ajak den külemi longjemer shilem agitsü mepishir,” ta Vikheho-isa ashi.