State sorkari Centre den jembitsüla: K Therie

Kohima, Aenjeti (January) 26 (TYO): Tang state nung terata tensa ka aliba ya Nagaland Legislative Assembly-i lemtetba, ‘Election magidang yimtenren latettsü’ bangzüng ajanga lir, ta tanü NPCC Tir, K. Therie-i sangdong ka nung metetdaktsü.
2017 küm Luchii (December) ita 15 nü NLA-i ‘Election magidang yimtenren latettsü’ atema akhangtsü bangzünga liasü.
“Tang Nagaland nung melungtet teloktem, Tribal Hohos aser lokti tentettemi Assembly bangzüngji pusemer.
Naga yimtenren telok ajaki NLA bangzüngji pusemer. NPF aser BJP na dak alaka yimtenren party ajaki State Assembly bangzüngji pusemtsü ta shiogo,” ta NPCC Tir-isa metetdaktsü.
“Asenoki ULB election nungi angazüktsüla. Iba tu tetsürtem nem menden shilem 33 shiteta yutsütsü anema lir aser NPF nungi kari adokdaktsba onüktem indang lir. Tanübo iba ya küm 93 tain yimtenren movement ka kümogo, koba ajanga nisung meyirjang aika taküm aser rongsen samaogo,” ta sangdong nungsa shia lir.
“ULB election onük nung nüburtemi sorkar anema curfew benokba mapang nung parnoki marakzüteti liasü, iba sülen tang-a tensa mazüokteti akumtsüa akok,” ta paisa metetdaktsü.
“Küm 20 ken o jembia arubaji teperi. Nüburtem ani-belemogo aser sorkar 10 nem sen agutsüba agi laktetogo. Iba onük nung longkak aitba ajanga onük aika akumtsüa akok, aser iba tensa azüoktsüji tasak asütsüa akok. NPF aser BJP party nati iba ya pungpa-pungpa magir ta ni bilemer. Nübur aser sorkar tsüngda mangatettep adokra ibaji ajanga nisung jenti asütsüsa akumtsüa akok. Iba tensa shisadanga state sorkari India sorkar den jembitsüla,” ta NPCC Tir-isa kasa sangdong ajanga metetdaktsü.