State sorkari council 12 nung ULB election agitsü lemtetba ajanga Nagaland tensa mejungi kümogo ; Dimapur nung nisung 2 asü, Longleng nung polling station den ballot box aika raksatsü, tanü tesem aika mokdanger

Kohima/Dimapur, January 31 (TYO) : State sorkari council 7 nung magiba dak alaka February 1 nü council 12 nung Municipal & Town Council elections agitsü lemtetba anema Nagaland kübok tesem aika nung tensa mejungi kümogo.
Yashi Nagaland Baptist Church Council (NBCC)-i Joint Coordination Committee aser state sorkar tsüngda tenangzüktep ka agidaktsüba sülen, tanü State Cabinet-i state ajunga nung elections magii atatsü atema telemtetba agitsü südi ta Naga nungertem ajaki imla liasü.
Ajisüaka, State Cabinet-i Municipal aser Town Council 7 dak alaka tanüngba council tem nung February 1 nü election agitsü ta lemtetba osang angazükba sülen Nagaland kübok tesem balala nung telok balalai lungkak aittsü tenzük aser asüng mokdangtsü ayongzükogo.
Angami Youth Organisation (AYO)-i Bodbarnü state yimtiba nung ghonda 7 mokdangtsü ayongzükogo.
Sorkari ashikülak aser tesempatsü mapa inyakba aser Naga nunger den lemsar yimsü asütsü tasa atongba ajanga tensa mejungi kümdaktsüogo, ta AYO-i sangdong ka nung metetdaktsü.
Kohima mokdangba mapang sorkar ketdangsertem mapa meinyakdaktsütsü, Government Registered Vehicles ka danga mesenzüdaktsütsü, Chief Minister-i anir MLA tem aser yimtenren teloktem nung presidents/chairman-i anir ketdangpur shinga yimjak nung menokdaktsütsü aser mesenzüdaktsütsü, ta AYO sangdong nung metetdaktsüogo.
Mokdangba mapang Indian Reserve battalion dena Nagaland Armed Police mesenzüdaktsütsü aser sorkar kiojen kar raksatsüra, ibaji aibelenertem khuret asütsü, ta AYO-isa ashi.
Ajisüaka, mokdangba mapang shishilembaba, dokantem meshibangtsü, Shisaliok rejutem aser mozükitem ajak lapoktsü, public tembo tetsüng agi mesüra gari nung senzütsü melatsü aser District Administration, Raj Bhavan, Police Headquarters, SP Office, North & South police stations, Chiephobozou Police station, Khuzama Police station, Zubza Police station, Phesema police station, Kezocha Police station, Fire service, Power Department, Para Military Forces, Media Fraternity aser Bank tem tenokdangba küboki maiter, ta AYO-i sangdong nung metetdaktsüogo.
Dimapur nung tanü anüngdang tashibo tensa junga dang liasü, saka nikongdang State Cabinet-i tesem kar nung election agitsü lemtetba osang angazükba sülen lanur meyirjang aika tesem balala nung adenshi aser dokantem shibangdaktsü.
Osang angazükba agi, lanur kari 3rd Mile nung State Chief Minister TR Zeliang’er ki den tanga sorkar indang kiojentem raksatsütsü amokmeren saka iba osang angazükba sülen Commissioner of Police, Dimapur-i taonung 8:00 ako nungi Dimapur nungi Chumukedima tashi 144 CrPC alitsü ozüng agütsü.
Ajisüaka, taonung menur lanur kari 3rd Mile nung Chief Minister’er ki amaktsü merang aser iba mapang sepaitemi parnok nokdangtsü atema injang kahdokdang nisung na kahset .
Dimapur nung tasürtem rongnung nisung kaji Angami nunger Avizo liasü aser pa indang mangji Referral Hospital nung lir ta osang ka ajanga ashi. Ajisüaka, iba osang zülu tashi nung Zion Hospital nung tasür ka indang maitsüji ano mejangjateti lir.
Ano külen, Longleng jila nunga nisung telok kati polling stations raksatsüba den ballot box tem rakzükba osang angazüker.
Osang ka ajanga ashiba agi, telok jagi polling station 5 den ballot box raksatsü aser ano polling station ana nungi ballot box rakzük.
Chakhesang Youth Front-i sangdong ka nung February 1, 2017 anepdang 6:00 ako nungi nikongdang 6:00 ako tashi Chakhesang nunger lushi ajunga mokdangtsü ta metetdaktsüogo.
Iba tenokdangba kübok Hospitals, pharmacies, security forces, administration, medical duties, wedding, funeral parties aser power dept maiter, ta parnokia ashi.
Mokdangba mapang Government registered vehicles mesenzüdaktsütsü aser iba dak sendakba nung Town/village Youths nem mapa lemzüktsür, ta CYF sangdong nungsa shia lir.
Ano, Chakhroma Public Organisation (CPO)-ia February 1 anepdang 6:00 ako nungi nikongdang 5:00 ako tashi parnok telongtet mokdangtsü ta sangdong ka nung metetdaktsüogo.
CPO-i national highway nung Piphema nungi Assam-Nagaland arrtsü tashi aser sendaktepba aliba gari lenmang ajak mokdangtsü, ta CPO President Vichütuolie Mere-i sangdong nung shia lir.
Tuensang nunga Chang Khulie Setshang, Confederation of Chang Students Union, Sangtam Union Tuensang Town, Khiamniungan Union Tuensang Town, Yimchungrü Union Tuensang Town aser Tuensang Village Citizens Union temi February 1 anepdang 6:00 ako nungi nikongdang 6:00 ako tashi Tuensang jila mokdangtsü ta sangdong ka nung metetdaktsüogo.
ULB election atema State sorkari nübortemi aginüba ama meinyakba aser Naga nungeri ola adokba pusema nungiter ta sayutsü atema mokdangba sentong ayongzüker, ta Tuensang jila nung tongti teloktemi ashi.