State sorkari memeteti senso magütsütsü: MHA

New Delhi, January 22 (Agencies): Northeast ajungalen Citizenship (Amendment) Bill anema ola adokaka, Union Home Ministry (MHA)-i Mongulbar ashiba agi, state sorkar nungi temelaba melii Bill kübok nisung shinga nema India senso magütsütsü.
“State sorkar nungi temelaba mali tashi shinga nema India senso magütsütsü” ta MHA otongdar Ashok Prasad-i ashi.
“India senso meshiba nisung shia district magistrate (DM)-i jangjatsü aser iba sülen state sorkar dang abentsü. State sorkaria agency tem ajanga maitsü indang kulitem bushiteptsü” ta paisa metetdaktsü.
Citizenship (Amendment) Bill ya Lok Sabha nung agizükogo saka Rajya Sabha nung ano magizük lir. Pakistan, Bangladesh aser Afghanistan linüktem nung reshikangshi ajuruba non-Muslim telok tilatem nungi züngsemtem India nung küm 7 lir külen senso angutsü temeten agütsür.
Northeast nung aser talisa Assam nung iba bill magizüker aser iba Bill ajanga Assam Accord of 1985 tetezü mali kümdaktsütsü ta ashir.
Home Ministry osang ka ajanga ashiba agi Centre sorkari senso aginürtem dang Northeast dak alia India kübok tesem mashii ka nung alitsü atema sentong ka yanglur.