State sorkari nüburtem dang mepeshi

Dimapur, Chiteni/July 30 (TYO): State sorkari Home Department ajanga ashiba agi, Dimapur aser Peren na arrtsü nung kin balala tsüngda ali dak sendakba nung mangatettep adoka arudar aser iba mangatettep ajanga mapang mapang shia tensa tamajungba kümdaktsütsü akok aser ibajagi temzüng ozüng tsütsü timtem bener arutsütsü.
Principal Secretary, Home, Abhijit Sinha IAS-i ashiba agi, State sorkari iba ken o ya süoki ia agia arudar aser mangatettep adoka aliba tem bentettsü asoshi maneni jenjang agia arudang, aji asünungdang kin o kin tsüngda tenunep aser yimjung nung liyonga otettsü. Yamaji temzüng ozüng shidak benoka benshiyonga aotsü asoshi mapang aben jenjang tapet agia tetuyuba balala agüja arudar, ta paisa ashi.
Naga nunger tem yimjung nung alitsü nükjidong nung state sorkari maneni Peren aser Dimapur district nung aliba kin balala dang yimjung aser tesunep nung alitsü asoshi mepeshiba den tensa tamajungba kümdaktsütsü asoshi jenjang kecha magitsü mepeshi. State sorkarisa kin ana nungi lemritem dang kechi südir süaka yimjung nung alitsü merangtsü asoshi jenjang tapet agitsü mepeshiogo, kechiyong yamaji asünungdang ajak temulung asütsüsa sorkari telemtetba tajung ka agitsü asoshi jenjang tapet agitettsü,” ta paisa ashi, ta ketdangser sangdong ka ajanga metetdaktsü.