State sorkari scholarship magütsüba atema ANCSU-i lungkak aiter

Kohima, November 20 (TYO) : State sorkari ita pezü dak tali süiaka Post Matric Scholarships magütsüba anema All Nagaland College Students’ Union (ANSCU)-i Hokolbar nungi lungkak aitba shilem mezüngbuba tenzükogo.

Centre sorkari parnok tagütsütsü noklang nung shilem 90 ji February 15, 2015 nü agütsü saka Nagaland state sorkari ita 9 süiaka tanüngba shilem 10 magütsüter, ta ANCSU tir Zhoku Thuluo-i osangbener dang ashi.

ANCSU-i aiben state sorkar dang scholarship agütsü atema mepishishia aru aser tatemsa November 9, 2015 nü State sorkar dang November 19 tashi nung scholarships magütsüra, lungkak aittsü ta mapang atakzüktsü, ta tirisa metetdaktsü.

Tanga state tem nung May mesüra June ita scholarships angur saka Nagaland nungbo kümshia kaketshirtem ita ana dak timbai menur ang angur, ta Zhoku Thuluo-i ashi.

Takümbo state sorkari ita pezü süia oaka scholarship magütsür aser iba jagi Nagaland sorkari shisaliok indang mangatetba sayur, ta General Secretary, Benjongakum Longchar-ia ashi.

Department of Higher Education mesüra Finance Department nungeri scholarships mapang shitak nung magütsüba atema ola madoker. Ajisüaka kodang ANCSU-i temepishiba agütsüdir, parnoki tenangzükbatem agir saka mapabo meinyaker, ta ANCSU mendenpurtemisa ashi.

Joko ANCSU-i kaketshirtem memesüzükteter, aji agi kaketshirtem account nung scholarship meinoktsü tashi ANSCU-i lungkak aitba mapa manentsü, ta parnokisa shisem.

Iba onük atema ANSCU-i May 25 nü temepishiba ka agütsü aser June 20 nü ibaji nenshia metetdaktsü. Kasa onük atema tesüsaba osang agütsübaji November 9 nü liasü aser idangji November 19 tashi nung agütsütsü anogo latettsü saka ibajia süiogo, ta ANCSU mendenpurtemisa ashi.