State sorkari tetsürtem asoshi ozüng yanglushitsü mulunga lir: T.R Zeliang

Dimapur, June 1 (TYO) : Nagaland sorkari Urban Local Bodies (ULB) nung tetsür nem nomination ajanga noklang nung shilem 25 agütsütsü mulunga lir, ta Nagaland Chief Minister, T R Zeliang-i metetdaktsü.
“Naga Mothers’ Association (NMA)-i State ULBs nung shilem 33 atema tekong meranga menoktaki, iba tebilemba mulunga agizükra, sorkari state assembly nung Municipal Council Act 2001 yanglushitsü” ta yashi NMA-i People Living with HIV atema Short Stay Home yangluba lapoktsüdang T.R. Zeliang-i ashi.
ULBs nung tetsürtem indang political nomination malitsü, saka district shia nung Deputy Commissioner temi NMA aser district nung tetsür teloktem den jungjunga asüngdangyaba sülen ang shilem 25 atema tetsürtem tenüng benoktsü, ta paisa ashi.
Ajisüaka, NMA-i sorkar tebilemba agizüktsü nungnanger aser Supreme Court-i obendang agütsüba nung ammeta lir, ta Chief Minister-isa shisem.
Supreme Court nung iba ken o benoka aliba ajanga Centre-i ULB fund atema küm shia sen crore 20-40 lemzüktsüba Nagaland-i magizükteter, ta T.R Zeliang-isa metetdaktsü.
NMA President, Abeiu Meru-i ashiba agi, parnoki ULBs nung shilem 33 angutsü takhangba agütsüba nungi masetshii noktaker.
“April 5, 2016 nü Supreme Court-i tetsür nem shilem 33 lemzükja municipal elections agitsü tetuyuba agütsüba nung ajemdaker Joint Action Committee on Women Reservation (JACWR)-i State Chief Minister aser Election Department dang tekaratiba nung municipal aser town council elections agitsü tezüluba nung agütsüogo,” ta Abeiu Meru-isa metetdaktsü.
“State sorkari mapa inyakba onoki atar aser SC-i oshidang agütsüba ama inyaktsü imlar. State sorkari iba tetuyuba ama mapa meinyakra, sorkari okadak mezüngmeshiba ken o ka benoktsü,” ta laisa shisem.