State sorkartemi kiralongraba senotsü osang melemsateper: Centre

New Delhi, September 13 (Agencies): State sorkartem aser Union territory temi kiralongrartem senotsü amshibayim osang melemsatepba ajanga sorkar lenmang nung tetsükdaktsü ajurur, ta osang ka ajanga ashi.
Kiralongraba nung ochimashiba senotsü amshiba, kiralongrartem senotsü aser iba dak sentakba tanga amokmeren acha ayanga reprangba Inter-governmental tentet, Financial Action Task Force (FATF) tetuyuba nung ajemdaker Centre sorkari telok ka tenteta lir.
Iba telok yagi August 19, 2015 nü state sorkar ajak aser Union territory ajak dang shidi ka ajanga, kiralongraba amokmeren, kiralongraba nung senotsü amshiyim aser iba dak sentakba osang August 30 nü tashi nung agüjang, ta metetdakja liasü.
“Tang tashi nung state sorkar mesüra union territory shinga nungia osang agüja mali,” ta senior sorkar ketdangser kati ashi.
‘Kiralongraba amokmeren’ nükjidong ya sepai aser intelligence ajanga kiralongraba osang bushitetba amokmeren osang asadangtsü asoshi lir.
Iba ya ajanga nija aser kiralongrar teloktem nungi pei tesem nung amokmeren ajuruba osang bendener. Iba ya ajanga kiralongraba kenotem, kiralongraba osang mesüra ken o bushisüngdanger, iba den külemi International dang nungi teyari anguba, teyari meshiba mesüra kiojen/osettsüset raksaba osang bendener.
Iba dak alia state sorkartemi, tanga intelligence osang, amokmerenba nung level asem-low, medium aser high osang, kiralongrartem anema operation aoba osang, operation mapang sen intokba, küm ka nung operation aoba budget, kiralongrartem sen arulen lenmang aser item dak sentakba osangtem meshir.
Kiralongraba senotsü ken otem nung, ken o kwi bushisüngdang, temerenshi agütsüba, nisung kwi aitsü, ken o kwi law enforcement agency tem dangi yok, international teyari kwiben meshi, teyari kwiben angu, kiralongraba sen kwi apu aser item dak sendakba osangtem bendener.
Ano ‘terrorism financing vulnerability’ nükjidongji linük apir kiralongrartem senotsü amshibayim nung parnok tashi asadangtsü atema lir.