State tasen tentettsü akhangertemi NDA dak tamang makar

Guwahati, Aami/June 29 (Agencies): Linük nung state balaka tentettsü takhangba agütsüba teloktemi tentetba National Federation of New States (NFNS)-i 2019 Lok Sabha elections nung NDA meyaritsü ama osang ka metetdaktsüogo.
NFNS nung Bodoland, Twipraland, Karbi State, Gorkhaland, Vidarbha tentettsü akhangba teloktem dena lir aser parnoki ashiba agi NDA-i state tasentem tentettsü ta nangükba ama meinyak.
“Chiteni (July) 26 nü New Delhi nung onok core committee senden ka amentsü aser iba mapang linük kübok tesem balala nung state tentettsü takhangba agütsüba lennirtemi 2019 general elections nung NDA den adentsü mesüra Congress-i aniba opposition yaritsü mesüra shinga meyaritsü telemtetba ka agitsü” ta NFNS tir Shreehari Aney-i ashi.
NDA mesüra opposition naprong meyraitsü telemtetba agiyonga state tentettsü takhangba agütsüba tesemtem nung NFNS-i shilem tulu agitsü, ta Aney-isa ashi.
“Tang state tenet nungi ti tashi tentettsü takhangba agütsüdar aser iba ajanga election nung mapa tulu inyaktettsü” ta paisa shisem.
Core committee senden mamendang Hokolbarnü NFNS-i north east nung aliba teloktem den ajurutepa senden amen.
NFNS nung Indigenous People’s Front of Tripura (IPFT) dena lir aser parnok ya Tripura nung BJP sorkar den yaritepba telok ka lir.
Parnoki ashiba agi Twipraland balaka tentettsü takhangba agütsübaji langzütsüla aser Chiteni (July) 26 senden nung party-i telemtetba ka agitsü.
Tripura sorkar nung onoki BJP yariaka, Twipraland balaka tentettsü takhangba mesama lir. Centre-i onok takhangba atema mapa inyaktsü nangzükogo. Anungji, Chiteni (July) 26 senden mamendang onok telok sasep nung olemteptsü, ta IPFT youth wing general secretary, Sukla Charan Noatia-i osangbener dang ashi.
All Bodo Students Union (ABSU) president, Pramode Boro-ia ashiba agi, 2014 parliamentary election nung state balaka tentettsü akhangertemi BJP pusema nungit kechiyong parnoki state tasentem tentettsüla ta ashi.
“Küm pezü tashi Centre nung BJP sorkari state tasentem tentettsü onük mejembii dang arur. State tasentem tentettsü atema mapa kecha meinyak. Boroland mesüra Gorkhaland-a süang BJP-i nangzükba ama meinyak. Anungji onoki BJP pusemba ajanga state balaka tentettsüba onük meyipa reprangshitsü, ta Boro-isa metetdaktsü.
Yaküm Centre den Boroland tentettsü indang tatemsabuba senden ka amen ta Boro-isa shisem.