State temi agizükba sülen ang education policy tasenba sangdongtsü: Irani

New Delhi, June 03 (Agencies): Hokolbarnü Union Human Resource Development Minister, Smriti Irani-i, state temi agizükba sülen ang National Education Policy tasenba sangdongtsü, ta metetdaktsü.

Tesüiba küm ana nung NDA sorkari inyaktetbatem sangdongtsü atema ayongba osangbenertem senden ka nung jembidang Irani-i, “Education policy ya nija ka meyong masü. Iba ya state tem den lemsateptsüla aser nüburtem dang mesangdongdang parnoki (state tem) tama agizüktsü nüngdaker,” ta ashi.

Taoba Cabinet Secretary, T.S.R. Subramanium-i, sorkari mesangdongra pai education policy tasenba sangdongtsü ta jembiba sülen tanü Irani-i iba o jembiogo.

Subramanium-i aniba züngsem pongu aliba ludeni education policy tasenba yanglua taoba ita HRD ministry nem agüja liasü.

Irani-i ashiba agi, tang mezüng linük nung kaketshirtem aser par tsüraburtem tebilemba angadanga education policy yangluogo.

“Onoki technology amshi aser yim lakh 1.10 lakh, block 5,000 dak tema aser state 20 dang nungi onoki parnok tebilembatem tezüluba nung agizüka liasü,” ta Irani-i ashi.

Minister-isa, kaketshirtemi shisaliok tajungba angutsü atema Modi sorkari IIMs 6 (Indian Institutes of Management), IITs (Indian Institutes of Technology) ana aser IIITs (Indian Institutes of Information Technology) pongu bendenlokogo, ta metetdaktsü.