State tensa atema tebilemtsü akar: NBCC

Dimapur, July 13 (TYO): Tang state nung yimtenren tensa aser yimtenren telung nung raratep aliba ajanga state yimsüsüba nung kongshiba atema Nagaland Baptist Church Council (NBCC)-i kanga tebilemtsü akar, ta Brihostibarnü NBCC-i sangdong ka ajanga metetdaktsü.
“Iba ama tayongzükba aliba tensa ka nung aser state nung tzüngluruwa ajanga timtem ajangshiba mapang ka nung Council-i MLA tem dang nüburtemi ajuruba timtem balala angateta inyaktsü aser tang ajangshiba timtem atema mera agia inyaktsü mepishir,” ta NBCC-isa metetdaktsü.
“Osangkakettem ajanga raraba, kati ka aitsütepba aser tenüng tamajung jaloktsüba dang nungibo tongtibang teinyaktsü aika lir. Telung nung mangatettep agi state nung aser tangalen telok aser camp tentetba ajanga tensa tamajungba dang akumtsü,” ta NBCC-isa metetdaktsü.
“Tsüngrem tenüng nung Council-i item MLA tem dang ken o jembia ajaki agizüktettsüsa tangatettep dangi aruba ajanga yimtenren nung tain shisatsü sayutsü mepishir,” ta NBCC-isa mepishia metetdaktsü.