State tesem ajaklen Mega Mock Drill exercise agiogo

Kohima/Dimapur/Mokokchung, November 21 (TYO): November 21, 2019 nü Secretariat Plaza, Kohima nung “Build to Last: Disaster Resilient Infrastructure” omen nung ajemdaker Mega mock drill agiogo; iba exercise ya Nagaland State Disaster Management Authority (NSDMA) Home Department, GoN-i NSDMA, GoI den senteper ayongzük aser NEPEx 2019 ajanga ketdangsüa agi, ta ketdangsertem osang ka ajanga metetdaktsü.
Iba exercise ya tsüngsang-mopung majungba den tzünglu sashia aruba ajanga Schools, Hospitals, Shopping complex, nisung aliba tesemtem aser office tem nung timtem ajangshibatem koktettsü atema agi.
Mock Exercise shilem asem küma lemsar agi: mezüngbuba stage-ji Incident Response System (IRS) aser coordination conference training liasü, tanabuba Stage ji Table-Top Exercise (TTEx) aser tasembuba stage ji Mock Exercise liasü. Iba exercise agidang volunteer 200-i asürtem aser yirurtem shilem agia liasü.
Iba exercise dak sendakba nung o tatsüka jembidang Principal Secretary School Education & SCERT & RO, Menukhol John-i, state yimtiba, Kohima den tanga districts nung mock drill kanga takok ngua agiogo, ta metetdaktsü.
Paisa iba exercise junga agitetba atema shilem agiba departments, police aser stake holders ajak dang pelaba lemsatep.
John-i iba exercise agiba mapang nung communication densema tanga tayongzükbatem ajangshiba lemsatepba den külemi pai, relief atema renema atatsü atema NSDMA-i aika angazükdar, ta shisem.
Iba exercise Observer, Kuldeep Singh-ia, iba ama mapang nung tensa asadangtsü atema ‘drone’ ama technology amshiba den külemi iba exercise lenla ajak nung junga agiba atema tenüngsang agütsü.
Paisa, iba exercise mapang ICP aser tanga office tentetba atema pelaba metetdaktsüba den külemi item ama exercise agidang tanga state temia reprangzüka iba ya benshitsü, ta ashi.
Paisa, iba ama exercise agitsü nüngdak, kechiyong anentsüh kanga buluba Nagaland ama state ka nung item ama lendong ajanga nisung jenti asütsü, ta ashi.
Item ama lendong mapang nung electricity aser communications system atema groups tentettsüla, ta pai inyakdaktsünüba olen ka lemsatep. Tanga Observers-ia parnoki ajangshiba aser mock drill agiba mapang takok anguba aser metokmeperi balala lemsatep.
Mock drill exercise nung Election, Home Guards, Police, Power, IPR, Planning & PWD departments-ia shilem agi.

Dimapur: Brihostibarnü Dimapur district nunga Mega Mock drill takok ngua agiogo; tanep 9:45 ako nung DCs office Dimapur aser Commissioner Police office nung siren ola agüja mock drill exercise tenzüka liasü.
Siren ola agütsüba sülen DC Dimapur aser Responsible Officer (RO), Anoop Kinchi IAS-i IRS system activate süa ketdangsertem ajak Dimapur DCs conference Hall nung adenshi. Iba sülen pai Dimapur district kübok tesem 22 nung tzümetsüng aliba osang ketdangsertem nem metetdaktsü.
Iba exercise agiba areas aser relief camps ji minute 30 tsüngda amenok aser resource ajakji Nagaland Badminton stadium (staging area) nung benden. Tzümetsüng tensa aliba tesemtem nung kümzükba maparen inyaktsü atema SDRF, NDRF, Home guard’s & Civil Defence, Magistrates, Assam Rifles, Police aser stakeholders prokshia yok.
Dimapur DC ya RO aser DDMA Dimapur nunga Chairman lir, aser iba exercise takok ngua agitetba atema pai departments aser stakeholders ajak nem tenüngsang agütsüba den pelaba lemsatepa liasü.
Observers aser ketdangsertemi reprangtetba nung ajemdaker DC-i, Community First Responders atema ano training nüngdak, kechiyong item ama lendong nung mezüng aramesoa inyakertemji First Responders lir, ta ashi.
ADC aser mock drill exercise atema Incident Commander (IC), V. Lovitoly Sema-ia, mashie mapang nung lendong mashie ataloktsü, aser disaster management ya resources ketdangsüba, renema ataba, inyakba aser asentenshiba lir, ta ashi.
Laisa, Dimapur nung mock exercise agiba mapang nisung 130 kümzük, nisung 84 nem first aid agütsüba sülen relief camp-i anir ao, nisung 25 hospital-i anir ao, matamabensar 5 kümzük aser tasümang 16 ngua Dimapur district Hospital nung aliba mortuary-i bener ao, ta metetdaktsü.
Laisa, tim departments-i resources peria bener aru; item rongnung ambulance 18, gari 13 observers 6 aser magistrates 12 liasü, ta ashi.
Observer temi, institutions timbaka nung ramps ama nüngdakba infrastructures maliasü, ta ashi. Parnokisa, tzüngluruwa mongpu matongdang amalitepa inyaktsü atema iba ama drills ano agitsü nüngdak, ta metetdaktsü.
Logistics & security sections nungi ketdangsertemia NSDMA-i ano handsets timba agütsütsüla aser RT sets amshibayim indang training agütsütsü nüngdak, ta ashi.

Mokokchung: Nagaland Disaster Management Authority (NSDMA) kübok state tesem ajaklen Nagaland Emergency Preparedness Exercise (NEPEx) agiba anogo nung Mokokchung nunga Mock Drill exercise agiogo.
Mokokchung Deputy Commissioner aser District Level Incident Response System (IRS) Responsible Officer, Limawapang Jamir leniba nung iba drill agia liasü.
IRS Team aser District Disaster Management Authority züngsemtem- District Administration, Line Departments, Para Military, Police, Home Guards, melungtet teloktem aser kaketshirtemi iba drill nung shilem agia liasü.